Siglir tar il cuntegn

Header

audio
Casa s. Martin: medi da chasa fa renfatschas als responsabels
Or da Actualitad dals 24.01.2024. Maletg: RTR
laschar ir. Durada: 6 minutas 14 Secundas.
cuntegn

Casa s. Martin Novas renfatschas envers responsabels a Trun

L'october 2023 aveva RTR confruntà ils responsabels da la Casa s. Martin cun critica d'anteriuras tgirunzas. Uss prenda era il medi da la chasa Martin Tomaschett posiziun e fa ulteriuras reproschas als responsabels.

Ils responsabels da la Casa s. Martin a Trun na vegnan betg a ruaus. L'october aveva RTR fatg public la critica da tgirunzas ch'avevan demissiunà. Quellas avevan surtut crititgà il mainachasa Donat Nay. Lez tractia il persunal cun memia pauc respect, il persunal na vegnia betg tgirà e dumondas da persunal na vegnian betg respundidas. Lez aveva refusà las renfatschas da lezzas uras.

Uss ha il medi da chasa da la Casa s. Martin, Martin Tomaschett, piglià posiziun en la publicitad. Tenor el reduceschian tant il mainachasa Donat Nay, sco er il president da la cumissiun chasa, lur agens problems sin la tgira. Sche la fluctuaziun saja uschè gronda aifer ina chasa, sche stoppian ins er guardar sin ils responsabels da la chasa.

Sche tants collavuraturs van en in onn, èn quai per mai bunamain fugitivs pervia dal manaschi.
Autur: Martin Tomaschett medi da chasa

Il nov pledader da medias da la Casa s. Martin, Linus Livers, relativescha questa fluctuaziun.

Il problem da persunal, la mancanza da persunal, n'è nagin problem specific da la Casa s. Martin, quai è in problem naziunal, schizunt in problem europeic.
Autur: Linus Livers pledader da medias Casa s. Martin

«Problem da cumpetenzas»

Tenor Martin Tomaschett sa tractia dentant dad in auter problem. Al mainachasa Donat Nay manchian las cumpetenzas. A la testa dad ina chasa da tgira dovrian ins cumpetenzas da manar, cumpetenzas dal fatg, pia da la tgira, dentant era cumpetenzas socialas sco er emoziunalas.

La Casa s. Martin na piglia nagina posiziun sin talas pretensiuns nungiustifitgadas.
Autur: Linus Livers Pledader da medias Casa s. Martin.

Tenor il medi da chasa Martin Tomaschett sajan tant il manader da la chasa Donat Nay, sco er il president da la cumissiun strategica Daniel Tuor ed er ils ulteriurs trais commembers da la cumissiun strategica, arrivads entras la politica en lur posts.

Quai è politica, quai san ins, quai è bia fratelli amici che protegian uss in a l'auter.
Autur: Martin Tomaschett medi da chasa da la Casa s. Martin

Er sin talas pretensiuns or da l'aria na prendia la Casa S. Martin betg posiziun, uschia Linus Livers. La chasa da tgira deploreschia dentant che Martin Tomaschett haja fatg il pass a las medias, avant che communitgar las renfatschas als responsabels da la chasa. Il medi sez percunter accentuescha ch'el haja pledentà pliras giadas il mainachasa Donat Nay sco er il president da la cumissiun strategica sin las problematicas.

video
Novas reproschas als responsabels da la Casa s. Martin a Trun
Or da Telesguard dals 24.01.2024.
laschar ir. Durada: 5 minutas 2 Secundas.

Midadas a la testa

Sco sustegn per la tgira ha la Casa s. Martin engaschà il december passà Andrea Brauch, tgirunza diplomada cun furmaziun da manar en fatgs da tgira. Ella duai stabilisar la tgira e sustegnair la chasa en dumondas dal fatg e da manar. Quai ha scrit la chasa da tgira il mardi en ina communicaziun. In sustegn, manegia Martin Tomaschett, senza il persunal necessari, na possia dentant er ella betg far grondas midadas. La tgira saja dal fatg anora gia uss buna, ella haja dentant memia bler da far.

Midadas stoppian en in'emprima lingia succeder a la testa dal manaschi. Concret pretenda Martin Tomaschett ina demissiun da Donat Nay, sco era dal president da la cumissiun strategica Daniel Tuor. Demissiuns na sajan nagin tema, ni dad in ni da l'auter, uschia hai num davart da la Casa s. Martin. Quellas na fissian era nagina schliaziun per las sfidas actualas. La chasa dovria uss simplamain era temp per pudair profitar dals impuls dad Andrea Brauch.

Al chantun n'èn anc nagins problems enconuschents

audio
Uffizi da sanadad prenda posiziun en chaussa Casa s. Martin
ord Actualitad dals 24.01.2024. Maletg: RTR
laschar ir. Durada: 4 minutas 44 Secundas.

L'uffizi da sanadad dal chantun ha confermà che la Casa s. Martin haja actualmain avunda persunal per occupar 50 dals total 60 letgs. Plinavant ha il manader da l'uffizi, Rudolf Leuthold, ditg ch'i na saja betg enconuschent ad el ch'i dettia problems en la tgira. Per il cas che responsabels da la chasa sezza, confamigliars da cussadentas e cussadents ubain il medi da chasa annunziassan tals problems, giessan persunas da l'uffizi a controllar il manaschi pli en detagl. Quai na saja fin uss però anc mai stà il cas.

Nus vegnin sa chapescha a dumandar e guardar tge ch'è propi chaussa, tge ch'igl è [cun questas renfatschas] e sin tge che nus pudain guardar.
Autur: Rudolf Leuthold manader da l'Uffizi da sanadad dal Grischun

RTR actualitad 17:00

Artitgels legids il pli savens