Da curt è vegnì introducì en l'entira Svizra in nov sistem da pajament da las cassas da dischoccupaziun. Quest sistem vegn mess a disposiziun dal Secretariat da stadi per l'economia (SECO), e duvrà da tut las 33 cassas da dischoccupaziun. Planisada era in'interrupziun dal sistem da duas emnas sur la midada da l'onn. L'introducziun dal nov sistem «Asal 2 » ils 6da schaner n'è lura però betg ida senza incaps.
Gian Reto Caduff, il manader da l'Uffizi per industria, mastergn e lavur, declera ch'i haja cunzunt dà problems tecnics en il sistem da pajament che saja da nov bler pli digitalisà. Il SECO haja supplitgà persunas a la tschertga da lavur d'inoltrar uschè blers documents sco pussaivel digitalmain. Quai haja lura gì per consequenza ch'il portal jobroom.ch n'ha betg pli funcziunà. Sin quest portal chargian persunas ch'èn a la tschertga da lavur ils documents che ston esser avant maun per il pajament da diarias («Taggelder»).
Problems tecnics sin il portal jobroom.ch
-
Bild 1 von 2. Pervia da la midada dal sistem n'era il portal da jobroom.ch savens betg cuntanschibel. Bildquelle: RTR.
-
Bild 2 von 2. Actualmain vesi ora meglier sin il portal. Bildquelle: RTR.
Grischun era pertutgà
Il problem exista en l'entira Svizra, uschia era en il Grischun. Tenor Gian Reto Caduff datti era qua retards da pajaments. Cifras pertutgant quantas persunas ch'èn pertutgadas, na po el betg inditgar.
I dat adina puspè glieud che s'annunzia tar nus pervia da retards da pajaments. Nus guardain lura, sch'igl è pussaivel da pajar ed avain per part era gia pajà anticipadamain.
Pajaments anticipads possian però mo vegnir pajads fin il di che la dumonda per in tal pajament è vegnida tschentada - pia betg per il futur. Perquai gidia in tal pajament betg adina.
Betg l'emprima emprova da modernisaziun
L'anteriur sistem da pajament ha ses origins ils onns 80. Gia avant diesch onns aveva la Confederaziun planisà d'introducir in nov sistem cun il num «Asal». Quella midada n'è la finala però betg vegnida realisada. Sco tar «Asal» ha la Controlla federala da finanzas era avertì tar «Asal 2» ch'i detti problems e ristgs.
I fiss franc stà meglier, sche tut avess funcziunà senza incaps davent da l'entschatta. Tals problems tecnics n'èn dentant betg rars.
Blers problems tecnics sajan en il fratemp vegnids schliads. Il sistem na funcziuni però anc adina betg dal tut sco quzai ch'el stuess.
Las cifras en survista dals mais ed onns
