Tar controllas da persunas han funcziunaris da l'Uffizi federal per duana e segirtad tschappà duas persunas cun rauba illegala che vulevan traversar il cunfin svizzer. Al cunfin a Castasegna hani confiscà armas, al cunfin da Campocologna guaffens engulads.
A Castasegna haja in um empruvà da vegnir en Svizra cun ina valischera plain armas. En l'auto da l'um da 56 onns hani confiscà ina pistola, muniziun, petschiers e plirs cuntels e stilets. L'um e las armas ha l'Uffizi federal surdà a la Polizia chantunala dal Grischun ch'investighescha vinavant il cas.
A Campocologno han ils guardiacunfins traplà in um che vuleva bandunar la Svizra cun ina valischera plain guaffens engulads. La polizia chantunala ha investigà e confermà ch'i sa tractia da guaffens ch'eran vegnids engulads la medema fin d'emna sin dus plazzals a San Murezzan.