Siglir tar il cuntegn

Center da pachets Vaz Sut Dapli persunal per dumagnar dumber da pachets

Pervia da las restricziuns da corona empostan adina dapli glieud lur rauba online. Quai senta er il nov center da pachets a Vaz Sut.

Enstagl da sco quintà 70’000 pachets per di vegnian il mument sortì radund 94’000. Per dar dumogn a questa unda ha la Posta perquai augmentà temporamain il dumber da persunal a Vaz Sut per 40 persunas. Vitiers sa gidian era pots che portian uschiglio mo ora brevs e collavuraturAs dal biro cun ils pacs.

Sco quai ch'il pledader da medias da la Posta svizra orientala, Thomas Schifferle, ha ditg envers RTR, sperian els però er sin il sustegn da la Confederaziun. La Posta haja fatg la dumonda da schluccar il mandat da prestaziun. Quel pretenda che 95% dals pachets sto arrivar ad uras. La schluccada dess in zichel spazi a la Posta e pigliass il squitsch dal temp, declera Thomas Schifferle. Lura arrivassan ils pacs simplamain in dus dis pli tard.

Vinavant fan era las discussiuns enturn in segund lockdown quitads a la Posta. In segund lockdown avess la consequenza che l'unda da pacs restass auta er il schaner, perquai che tut las stizuns fissan lura serradas, di Thomas Schifferle.

Or da l'archiv:

E qua anc la via d'in pachet da Quinten a Surin, l'onn 1965:

RTR novitads 16:00

Artitgels legids il pli savens