La primavaira 2021 ha la construcziun cumenzà, la primavaira 2024 duai la nova pratica da medis da chasa communabla a Poschiavo vegnir inaugurada.
Las lavurs giajan tenor urari, han ils responsabels infurmà quest'emna las medias, sco Il Bernina scriva. En il nov edifizi gist dasper l'ospital San Sisto a l'ur da Poschiavo, èn previs dasper la pratica da medis da chasa era stanzas per spezialists, in'apoteca publica e novs biros per la Spitex. Sin il tetg vegn fabritgà ina plazza da platgar per il helicopter.
Il project custa bun 8 milliuns francs e vegn finanzià dal Centro Sanitario Valposchiavo sez. El duai dar nov schlantsch al provediment medicinal da la regiun periferica e segirar quel. En pli duai el augmentar l'attractivitad per medis. E tals hajan ins chattà per la nova pratica da medis da chasa communabla, han ils responsabels infurmà vinavant. Ina dunna e dus umens giuvens vegnan a cumenzar lur lavur en il decurs dal 2024 e 2025.
Tge capita cun il spazi che vegn liber?
En ina segunda fasa prevesa il project da reorganisar il spazi che vegn liber en l'ospital, quai cun in focus sin la tgira d'attempads. En pli duai dar novs biros, ina stanza da conferenza e stanzas per persunal da pichet e per studentas e giarsuns.
