Ils arguments da la PCD giuvna èn fitg simpels. Bigliets per ir cun skis èn memia chars per persunas ch'èn en scolaziun. Ils blers territoris da skis pretendian il medem pretsch per giuvens davent da 18 onns sco per creschids ed i na dettia naginas reducziuns per giuvens en emprendissadi ni scolaziun sco per exempel tar la Viafier Retica u tar l'SBB. Pervia da quai prefereschian ils giuvens sports alternativs pli favuraivels è la PCD giuvna persvasa.
Consequenzas fatalas
Che adina pli paucs giuvens van sin pista haja er consequenzas fatalas a lunga vista per las pendicularas, perquai ch'ils giuvens dad oz na giajan er betg pli tard cun lur uffants sin pista. Perquai saja impurtant dad uss prender mesiras.
Custs ston pendicularas surprender
La PCD giuvna ha er gia gì discurs cun lur collega da partida Maurus Tomaschett ch'è en suprastanza da las pendicularas grischunas, quels discurs sajan stads positivs uschia Fabian Collenberg, co-president da la PCD giuvna. Ils custs stoppian dentant la finala las pendicularas surprender, quai sa paja dentant cun daplirs osps, er a lunga vista, da quai è la PCD giuvna persvasa.
La PCD giuvna rimna las suttascripziuns sin sia pagina d'internet fin ils 30 da zercladur – silsuenter vegn la petiziun surdada a l'organisaziun da branscha da las pendicularas Grischunas.
RR actualitad 12:00