Per 1’900 giuvnas e giuvens cumenza oz glindesdi cun l’emprendissadi in nov chapitel en la vita – quel da la vita professiunala. Quai che croda dentant si è, che la dumonda d’emprendist è bler pli gronda che la purschida. «590 plazzas èn anc libras il mument», di Walter Järmann, il manader da l’inspecturat professiunal dal Grischun.
Igl è da relativar in zichel
Cifras ch’i saja dentant da relativar in zichel, cunquai che las cifras na vegnia betg actualisadas immediat. Vitiers dettia quai era per part interpresas che fetschian duas annunzias per ina plazza.
«Enfin ussa avain nus en mintga cas bun 1’900 giuvenils che cumenzan quest onn l’emprendissadi, pia bun 90 pli paucs ch’anc il 2014.» Quai possia dentant anc sa midar ils proxims dis, cunquai che bun 10% dals giuvenils grischuns cumenzian in zichel pli tard l’emprendissadi: uschia per exempel en las valladas talians.
Grondas fadias da chattar emprendists en il turissem
Las plir grondas fadias da chattar emprendists han el Grischun il commerzi en detagl ed il sectur da hotel, gastro e turissem: «I manca simplamain da quels che vulan emprender da vendider, cuschinier ni da spezialist d' hotellaria per exempel», uschia Walter Järmann.
Dentant era en il sectur da construcziun datti bleras plazzas d’emprendissadi ch'èn anc libras. Uschia che las interpresas èn savens sin la tschertga da miradurs, installaturs sanitars, scrinaris ni era lainaris.
Mastergn da siemi dals giuvens grischuns
Fitg dumandadas tar las giuvnas ed ils giuvens grischuns è cunzunt l’emprendissadi da commerzi. «Sch’ins mira sin nossas glistas, lura è il mastergn da commerziant, quasi il mastergn da siemi», di Walter Järmann. «En mintga cas figurescha el sisum las glistas da rangaziun.»