-
Bild 1 von 4. Annafried Widmer-Kessler -. l'xperta per plantinas sa raquintar bellas istorgias da plantinas. Bildquelle: RTR, S. Bundi.
-
Bild 2 von 4. Las rosas - . ellas èn il perfetg accumpagnader dal carstgaun, è Peter Müller persvadì. Bildquelle: RTR, S. Bundi.
-
Bild 3 von 4. Il chardun tenschider. Roman Ochsner ha in tip per la cuschina: Prender empè da safran il chardun tenschider per far risot. Bildquelle: RTR, S. Bundi.
-
Bild 4 von 4. Sin l'Arcas a Cuira. Malgrà la plievgia è la fiera da plantinas a Cuira stada bain visitada. Bildquelle: RTR, S. Bundi.
«I dat dapertut flurs, per quel che vul vesair ellas», ha l'artist Henri Matisse ditg ina giada. Flurs hai dà tut a dubel a la fiera da plantinas a Cuira. E sper citats, dat quai per quasi mintga flur er ina pitschna istorgia, in'anecdota, ina paraula ubain in cussegl.
Per exempel sur dal chardun tenschider, per tudestg Färberdistel. La flur melna duvravan ins en il Tessin per far risot da safran. Il safran era memia custaivels, ed uschè han ins prendì il chardun tenschider che dat er al ris ina colur melna e che gusta sumegliant sco il safran.
Il perfetg accumpagnader dal carstgaun
Ed er davart la rosa, probablamain la flur la pli populara, datti d'udir fatgs interessants. Uschè bella è la rosa vegnida pir, cur ch'il carstgaun ha cumenzà a cruschar differentas sorts da rosas selvadias.
Sper tips e fatgs anc ina paraula. Per exempel la paraula da l'um vegl ed il fav, in um ch'era adina ventiraivel. E quai grazia a la fava. Mintga damaun metta el en ses satg dretg da ses tschop 12 favs. Ed adina cur ch'el vesa ubain auda insatge bel, metta el in da quels favs en il satg sanester. E la saira cur ch'el va a durmir, sa regorda el anc ina giada da tut ils bels muments... L' istorgia ha Annafried Widmer-Kessler raquintà. E betg be quella, ella enconuscha er ina istorgia da l'Engiadina davart l'origin dal peterschigl.