L'emprim tagl saja gia terminà en las bleras regiuns dal Grischun. Quel haja purtà ina racolta mediocra, declera Batist Spinatsch, manader dalla cussegliaziun dal Plantahof. «En las regiuns dal Sid, en il Puschlav e la Mesolcina, avain nus gì fitg bunas racoltas en cumparaziun cun l'autra part dal chantun Grischun.» Malgrà ch'in segund tagl n' è anc betg en vista, saja anc memia baud da cumprar fain. I saja uss da spetgar e guardar tge che capita il fanadur e l'avust. «En las regiuns muntagnardas fa l'emprim tagl ora enfin 70% da la racolta d'in onn», declera el.
Vitiers vegnia ch' ins haja fatg experientschas en auters onns che l'aura possia midar uschia ch'i dettia tuttina anc in bun terz tagl che cumpenseschia alura il segund tagl manglus. Dapi l' onn da sitgira 2003 haja il center federal per la perscrutaziun agrara, Agroscope, fatg diversas perscrutaziuns davart questa tematica. «Ins ha chattà ora che l'erva sin la prada sa regenerescha fitg svelt sch' ei dat ina detga plievgia. Quai malgrà ch' ella vesa ora brina e brischada», uschia Batist Spinatsch.
Dumonda pli ferma, ma betg intensiva
E vairamain: il commerzi da fain stagneschia il mument, di Ruedi Zgraggen, president da l'Uniun Svizra da Pavel Sec. In zic auter tuni tar Hans Hug da Muolen en il chantun Son Gagl. Dapi 40 onns furnescha el fain era a purs en il Grischun. Tut tenor grondezza dal manaschi èn quai tranter diesch e ventg tonnas. «Ins senta il mument ina dumonda pli ferma, ma betg ina dumonda fitg intensiva.»
Ins na saja anc betg uschè lunsch sco en ils onns da setgira 2003 u 2006. Prognosas na less el dar naginas. Sche u quant bler pavel che stoppia tut tenor vegni cumprà, possia ins dir per l'atun, cura ch' ils purs hajan ina survista finala da lur racolta.
RR actualitad 12:00