I va per blers daners ch'ils stans da sajettar en il Grischun ston investir per restar confurms a la lescha. Per mintga schiba da sajettar ston els quintar cun custs da sanaziun da 5'000 fin 10'000 francs. Quels custs na pon las bleras uniuns da tir betg purtar, uschia Walter Burkhardt, il president ad interim da l'uniun da tir chantunala. Er saja la dumonda sche las vischnancas vulan ni pon surpigliar quels custs per uniuns che vegnan adina pli pitschnas.
I vegn a dar fusiuns
Tenor Walter Burkhardt saja fitg probabel che bleras uniuns stoppian sa metter ensemen e sajettar en il futur mo pli sin in stan, in stan che saja dentant confurms a la lescha. En il futur dess quai pia pli paucs stans, persuenter pli moderns.
Uniuns pli fermas
Positiv da quai svilup saja plinavant che las uniuns ch’han problems da chattar suprastants daventassan pli grondas e pli fermas. Uschia ch'i fiss lura er pli simpel da chattar avunda suprastants. Uschè negativ co quai tuna en l'emprim mument na fiss l'entira chaussa tenor Walter Burkhardt pia betg.