«Tar dubis dumandai ad uffants e geniturs pertutgads», stat scrit a la fin d'in document dal comité Gea a l'iniziativa da linguas estras. Tenor els n'èn ils scolars en scola primara anc betg capabels dad emprender grammatica e pledins en scola. «Ils uffants èn surdumandads e perdan uschè l'interess vi da la lingua», manegia Nicole Saager. Quai ha la logopeda vis era tar l'atgna figlia.
Plinavant han ils scolars en scola primara gia cun ils auters roms d'emprender fitg bler. Cun il plan d'instrucziun 21 vegnan tiers per exempel informatica e medias u etica. Lura anc emprender duas linguas supplementaras saja memia bler, manegia l'iniziant Jöri Luzi.
Era uffants che na discurran nagina lingua chantunala, sco uffants dad immigrants, vegnan uschè stgargiads. Quels ston uschè u uschia gia emprender tudestg, tudestg da scrittira e per il solit anc rumantsch u talian.
Nagin dischavantatg per Rumantschs
Tenor l'iniziativa emprendessan ils scolars e scolaras en scolas rumantschas e talianas englais pir en stgalim superiur. Quai crititgescha surtut la Lia Rumantscha e la Pro Grigioni Italiano. Il comité pro vesa quai auter. Cunquai ch'ils scolars avessan dapli temp per la lingua materna, vegnissan il Rumantsch ed il Talian rinforzads. La differenza da nivel en l'englais pudessan ils scolars senza problems prender suenter en secundara u reala.
In sistem ineffizient
Per il mument han ils scolars duas fin trais lecziuns l'emna ina lingua estra. Quai saja memia pauc per pudair propi emprender bain ina lingua, manegian ils aderents da l'iniziativa. Quai ch'ils scolars emprendan en scola primara, emprendessan els en il stgalim superiur entaifer curt temp. En il stgalim superiur sajan ils scolars pli sviluppads. Emprender pledins e grammatica giaja lura pli simpel ch'en scola primara.
Davart l'Iniziativa per mo ina lingua estra en scola primara decida il suveran grischun ils 23 da settember.
RR actualitad 17:00
