Il chantun Grischun è perplex suenter che l'Uffizi federal da traffic ha surlavurà il concept per la purschida 2035 che tracta era las viafiers. Quel prevesa tranter auter nagins trens internaziunals pli fin Cuira. Per far viadis a Paris, Berlin u Vienna fissi uschia da midar pliras giadas tren.
Per il manader da l’Uffizi chantunal per energia e traffic Thomas Schmid èn quests plans da Berna per il 2035 ina catastrofa, sco el ha ditg envers il schurnal regiunal da SRF:
Concret na va per exempel il ICE che vegn da la Germania betg pli fin Cuira, mabain mo pli fin Basilea. Il medem vala per il TGV che vegn da Paris: lez aveva il chantun atgnamain vulì prolungar fin Cuira. E cunquai ch'ils trens da Vienna na vegnan betg pli ad ir sur Sargans, vegn era quest viadi ad ir pli ditg.
Trens entaifer la Svizra vegnan a cursar pli savens
Tenor l'Uffizi federal da traffic saja questa midada giustificabel, cunquai ch'ils trens entaifer la Svizra vegnan a cursar pli savens. Per Thomas Schmid na va quai betg si. L’acceptanza per il traffic public saja periclitada sch’ils passagiers ston midar pli savens trens, ha el ditg.
Vi dal concept per la purschida 2035 vegn lavurà vinavant. Planisà è ch’il Cussegl federal deliberescha il 2026 la versiun definitiva.