Avant in onn ha la suprastanza da l’uniun Filarmonia grischuna scrit ora la plazza. 5 candidats han gì la pussaivladad da far provas cun l’orchester, da quels èn anc en la cursa Christoph- Mathias Müller, Philippe Bach e Philipp von Steinäcker. Els han la pussaivladad da preschentar cun l’orchester differentas ovras en il teater da Cuira. Ils 3 candidats pon sez decider il program ed ils solists. Uschia less il comité examinar il dun musical, la collavuraziun ed emprender d’enconuscher ils dirigents durant lur lavur.
Ils criteris
Sper la musicalitad è era la chemia tranter orchester e dirigent fitg impurtanta. Ella sto funcziunar. Perquai è la suprastanza da l’uniun Filarmonia grischun adina en dialog cun ils musicists. Ils dus musicists Christoph Butz e Peter Schneider represchentan l’orchester en la suprastanza. Suenter ils 3 concerts ston ils musicists valitar la collavuraziun e far ina rangaziun cun ils favurits. Quella valitaziun e la basa per la decisiun finala da la suprastanza. Mez december vegn il nov dirigent preschentà.
Concerts en il teater da Cuira
Christop-Mathias Müller è il prim dirigent che presenta il concert cun la solista Tanja Tetzlaff ed il solist Matthias Würsch, quai mardi ils 27 d’october a las 20:00. Philippe Bach preschenta dumengia ils 29 da november a las 17:00 ovras dad Edvard Grieg. Sco ultim preschenta lura Philipp von Steinäcker ses program cun il tenor Andrew Staples ils 7 da december a las 20:00.