La basa linguistica da las persunas d'instrucziun saja fitg impurtanta, ha il minister d'educaziun dal Grischun, Jon-Domenic Parolini, ditg envers las medias.
Sche las persunas d'instrucziun n'han betg la qualitad necessaria, ha quai in effect da multiplicatur sin scolaras e scolars.
Per pudair far ils emprims pass en il svilup dal sistem per certificats rumantschs saja stà impurtant da focussar sin ils dus nivels e sin dus idioms. Quai tenor il manader dal project Rico Cathomas, che maina la professura speziala a la Scola auta da pedagogia dal Grischun. Il partenari da project, l'universitad da Turitg, haja cusseglià ad els quest proceder.
Igl è cumplitgà da far buns tests.
Ils certificats rumantschs tenor models enconuschents
Il project «Certificat rumantsch» da la Scola auta da pedagogia dal Grischun duai sviluppar ina mesira scientifica per l'enconuschientscha dal rumantsch tenor la Norma europeica communabla per las linguas. Concretamain duai esser pussaivel d'eruir en il futur sistematicamain las enconuschientschas linguisticas e da certifitgar quellas. La regenza grischuna sustegna la scola auta tar il svilup da quest certificat.
Sco quai ch'il rectur da la Scola auta da pedagogia Gian-Paolo Curcio ha ditg sin dumonda da RTR, duain ils certificats per il vallader ed il sursilvan esser pronts sin la fin dal 2024. Sch'ils criteris dals tests cuntentian, duain lura er suandar ils certificats per ils ulteriurs idioms ed il rumantsch grischun.
Emprims certificats per persunas d'instrucziun
Sco che la Chanzlia chantunala scriva, duai vegnir retschertgada la cumpetenza en rumantsch da las futuras persunas d'instrucziun da tut ils stgalims. A vista mesauna duai il test lura star a disposiziun a tut las persunas che vulan avair ina cumprova da lur cumpetenza linguistica sin in nivel fitg aut. A lunga vista duai la cumprova da cumpetenza daventar pussaivla er per auters stgalims da cumpetenza.
Anc betg cler saja tgi u tge instituziuns che pon la finala dar ora ils certificats.
