Approvà il program da cooperaziun cun l’Italia
La regenza ha approvà il program da cooperaziun «Programma di cooperazione transfrontaliera Interreg VI A Italia–Svizzera» sco era la cunvegna da program «Convenzione di programma Interreg VI Italia–Svizzera 2021-2027. Per la perioda da program che dura 7 onns metta il chantun Grischun a disposiziun passa 3 milliuns francs.
En il focus dal program «Interreg VI A Italia–Svizra 2021-2027» stattan tranter auter projects dals secturs da l'innovaziun e dal transfer da tecnologia, da l'adattaziun a la midada dal clima, da la mobilitad persistenta e transcunfinala, dal turissem sco era da la valurisaziun da la natira e da la cultura.
En il rom da sia politica da coesiun promova l'Uniun europeica cun programs d'Interreg la collavuraziun transcunfinala e transnaziunala da ses pajais commembers e da terzs stadis. La finamira è quella da prender per mauns cuminaivlamain sfidas e da sviluppar soluziuns innovativas per utilisar ils potenzials disponibels, e tut quai cun agid da projects transcunfinals. Il chantun sa participescha dapi l'onn 1996 ad Interreg.
Regenza metta en vigur la revisiun parziala da la Lescha davart la protecziun da la natira e da la patria
La revisiun parziala da la Lescha chantunala davart la protecziun da la natira e da la patria ch'è vegnida concludida dal Cussegl grond, entra en vigur sco previs il prim da november 2023. Cun l'entrada en vigur da la revisiun parziala vegn abolida la pausa d'inventarisaziun areguard l'Inventari chantunal dals edifizis. Questa pausa era vegnida decretada ils 3 da november 2020. La registraziun da l'Inventari chantunal dals edifizis po pia puspè vegnir reprendida e cuntinuada sin ina nova basa.
En connex cun l'elavuraziun da l'Inventari chantunal dals edifizis vegn reglada da nov l'inclusiun da las vischnancas en il process. Er ils criteris per inscriver in object en l'Inventari chantunal dals edifizis vegnan concretisads.
Per precisar e concretisar ils criteris menziunads ha la Tgira da monuments dal Grischun elavurà il «Agid d'execuziun tar l'Inventari chantunal dals edifizis». Il cuntegn da quest agid d'execuziun sco er ils decurs concrets per elavurar l'Inventari chantunal dals edifizis vegnan explitgads bainbaud per tut las persunas interessadas en il rom d'ina occurrenza d'infurmaziun.
Contribuziun chantunala per la fundaziun Svizramobila
Il chantun Grischun cuntinuescha durant ulteriurs quatter onns cun la collavuraziun cun la fundaziun Svizramobila. Las infurmaziuns davart las rutas hajan ina concepziun unitara, èn d'auta qualitad e vegnan preschentadas en pliras linguas. Sin in'app pon ins clamar si tut las rutas e las infurmaziuns respectivas. L'infrastructura existenta dal traffic turistic betg motorisà vegnia valurisada supplementarmain en il chantun grazia a las rutas da Svizramobila. Per quests motivs haja la regenza concedì ina contribuziun chantunala da totalmain 244’000 francs.
Contribuziun chantunala per l'exposiziun professiunala Fiutscher
La regenza garantescha a l'Uniun grischuna d'artisanadi e mastergn ina contribuziun chantunala da maximalmain 370’000 francs per l'exposiziun professiunala Fiutscher 2023 che ha lieu a Cuira.
L'exposiziun ha lieu dals 15 fin ils 19 da november 2023 a Cuira. Tenor l'Uniun grischuna d'artisanadi e mastergn èn s'annunziads 80 expositurs, che vegnan a preschentar en la Halla da la citad da Cuira 150 professiuns e 240 furmaziuns supplementaras. La surfatscha da l'exposiziun è vegnida engrondida ed il program accumpagnant vegn extendì per cuntanscher las gruppas en mira da las persunas responsablas per l'educaziun, dals confamigliars, da las persunas d'instrucziun e da la vasta publicitad cun differents temas davart la furmaziun professiunala. Durant l'exposiziun professiunala Fiutscher vegn ultra da quai manà tras il Campiunadi svizzer da las spezialistas e dals spezialists da products da charn.
Contribuziun a la realisaziun da project da biatlon
La regenza ha concedì ina contribuziun da maximalmain 60’000 francs ord la finanziaziun speziala Sport a la Federaziun grischuna da skis per la realisaziun dal project da biatlon «Become a shooting star».
En il rom dal Campiunadi mundial da biatlon 2025 a Lai vul la Federaziun grischuna da skis render enconuschent il sport da biatlon en las scolas grischunas. En il rom dal project duai vegnir engaschà per dus onns in'ambassadura u in ambassadur da biatlon. Questa persuna vegn a visitar las scolas primaras grischunas ed a mussar a las scolaras ed als scolars il sport da biatlon a maun d'ina lecziun da sport pratica en la halla da gimnastica.
Approvà project forestal da la vischnanca da Sursaissa Mundaun
La regenza ha approvà sut tschertas cundiziuns il project «Avertura forestala Horawald» da la vischnanca da Sursaissa Mundaun ed ha concedì ina contribuziun chantunala da maximalmain 4’968’000 francs.
Il project cuntegna la sanaziun da la via da guaud da St.Martin fin Bäraboda, la sanaziun da la via da Gluggeri fin Bebmerbrunna sco era la sanaziun da la via da Schindelboda fin Hindara Horawald. Ils guauds en il territori dal project protegian abitadis, vias chantunalas sco er interpresas e manaschis industrials da lavinas, da sbuvadas, da bovas e d'auas grondas. Ultra da quai adempleschan quests guauds er ina funcziun impurtanta per la producziun da laina.
Per ademplir duraivlamain questas funcziuns dal guaud dovri ina tgira ed ina cultivaziun correspundenta. L'avertura actuala da quests guauds è dentant insuffizienta. Insuffizientas èn cunzunt la ladezza e la capacitad da chargia da las vias existentas, uschia ch'i n'è betg pussaivel da cultivar il guaud en moda effizienta e segira.
Per consequenza èsi necessari da meglierar l'avertura dal guaud. Cun la sanaziun da las vias existentas pon ils guauds vegnir cultivads en l'avegnir en moda professiunala ed effizienta.