La consula generala da la Republica populara da la China dr. Gao Yanping è vegnida beneventada dal president da la regenza Christian Rathgeb e dal chancelier Claudio Riesen. Gao Yanping è vegnida accumpagnada da la consula Zhou Min e dal viceconsul Zhang Fengye. Suenter il barat dals salids uffizials è in gentar cuminaivel stà sin il program.
La regenza grischuna tgira annualmain ils contacts cun represchentantas e represchentants da stadis esters en Svizra. Quests discurs èn elements impurtants da las relaziuns dal Grischun cun l'exteriur, scriva la chanzlia chantunala.
Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.
RR novitads 15:00