Igl è stà cler davent da l'entschatta: Il Grischun sto reducir las zonas da bajegiar ed introducir in sistem da gulivaziun tranter perdents e victurs. La via per cuntanscher quella finamira è dentant stada lunga e crappusa – cunquai che las partidas avevan fitg differentas opiniuns. La finala è sa resultà in cumpromiss.
Interessant èn surtut dus puncts stads: Mesiras per mobilisar terren da bajegiar ed in sistem da gulivaziun:
Taxa da 30% sin plivalita
L'instrument principal per gulivar avantatgs e dischavantatgs enten reducir zonas da bajegiar è in sistem da gulivaziun: Tgi che profitescha sto pajar ina taxa. Il Cussegl grond ha decidì che quella duai valair mo per terren che vegn enzonà da nov sco zona da bajegiar – betg per midadas da zonas. Deputadas e deputads èn sa tegnids vi dal minimum che la Confederaziun prescriva – la regenza avess vulì ina taxa pli vasta.
La taxa sco tala vegn fixada sin 30% da la plivalita. Quai è in cumpromiss: La Partida socialdemocratica vuleva perfin 40% la Partida liberaldemocratica mo il minimum che la Confederaziun pretenda, numnadamain 20%.
Las entradas ord questa taxa van en in fonds per cumpensar possessurs da terren che perdan (p.ex. sche lur terren vegn prendì ord zona da bajegiar) e per curclar ils custs da las 67 vischnancas che ston reducir lur zonas da bajegiar.
Motivar da surbajegiar terren da bajegiar
L'idea è d'evitar terren da bajegiar che resta sur onns ora vid. Perquai descriva la lescha chantunala pussaivladads per las vischnancas, co motivar possessurs da propi nizzegiar lur terren e surbajegiar quel. La vischnanca po pretender ch’il possessur bajegia aifer 8 resp. 10 onns. Sch’el na fa betg quai, po la vischnanca cumprar il terren ubain pigliar quel ord zona da bajegiar. La lescha è dentant formulada uschia che las vischnancas PON far quei – na STON dentant betg.
Lunga debatta d'entrada
Che las partidas han opiniuns fitg differentas tar la planisaziun dal territori è sa mussà gia en la debatta d'entrada, ch'è stada lunga e per part emoziunala. La finala ha il Cussegl grond decidì mesemna suentermezdi cun 86 cunter 31 vuschs d'entrar en la materia e tractar la lescha – quai cunter la veglia da la PPS e circa duas terzas da la fracziun da la PLD.
La maioritad da las deputadas e dals deputads è stada da l’avis ch’i dovria ina discussiun davart las dumondas co reducir zonas da bajegiar – spustar ubain refusar la debatta na saja nagin’opziun.
Il president da la cumissiun che ha preparà la revisiun, Emil Müller (PBD), ha fatg attent che la lescha davart la planisaziun dal territori saja ina da las tractandas las pli impurtantas e cumplexas da l'entira legislatura. La cumissiun haja discutà las propostas da la regenza durant passa 20 uras.
Realisar pretensiuns dal dretg federal
Insumma stuì reveder sia lescha davart la planisaziun dal territori ha il chantun stuì per s'adattar al dretg federal. Il mars 2013 aveva il suveran svizzer numnadamain acceptà ina revisiun da la lescha federala davart la planisaziun dal territori. Tut ils chantuns han temp per far lur adattaziuns enfin l'avrigl 2019. La lescha grischuna va probabel en vigur l'entschatta 2019.
RR actualitad 07:00