Mo in terz da la populaziun grischuna s'interessescha per tgi che regia ils proxims 4 onns il Grischun. Quai para bass, n'è dentant betg nunusità, di Walter Frizzoni, vicechancelier grischun. Il suveran grischun saja en general plitost marsch d’eleger ni da votar cumpareglià cun il rest da la Svizra.
Ina da las raschuns pussaivlas: naginas candidatas
Daco che mo paucs han elegì po avair differents motivs, di Frizzoni. Il scandal da bajegiar e las enquistas da la WEKO, naginas dunnas tranter ils candidats u nagin interess da votar.
L'onn 2006 era la participaziun anc pli bassa
L’onn 2006 avevan mo 24 pertschient da la populaziun elegì ina nova regenza. Quai onn deva quai dentant mo 5 candidats per 5 sezs, pia nagin cumbat, e la votaziun federala che accumpagnava l’elecziun era ina sitga.
Dapli participaziun entras in pachet attractiv
L’onn 2014 han 43 % da la populaziun grischuna cun dretg da votar elegì ina nova regenza. Questa giada eran las elecziuns accumpagnadas da l’iniziativa che scumandava a pedofils da lavurar cun uffants e da la votaziun davart ils aviuns Gripen. Pli fitg che la populaziun saja pertutgada, pli numerus ch’ella giaja a l’urna, uschia Frizzoni.
RR actualitad 07:00