La naiv da venderdi suentermezdi ha procurà per situaziuns difficilas sin las vias grischunas. Fin venderdi saira haja dà tenor la polizia chantunala almain sis accidents.
A Nufnen è in auto collidà cun in camiun cisterna. Pervia da pneus da stad na saja l’automobilist da 62 onns da l'Italia ch'era en direcziun vers Spleia betg vegnì da franar. Ses auto è vegni donnegià dal tut, il camiun cisterna ha gì in donn da var 5'000 francs.
A Bivio è in automobilist charrà en in auto da furniziun. Omadus autos èn vegnids donnegiads dal tut. Era qua hajan pneus da stad chaschunà l’accident. Blessads naja dentant dà nagins.
Spustà avertura dal pass Alpsu
Sco consequenza da la naiv vegn l'avertura dal pass Alpsu spustada sin mesemna, l'emprim da matg. Sin il pass haja actualmain dapli naiv che auters onns ed ins quintia ils proxims dis cun enfin 40cm naiv nova. Quai communitgescha l'uffizi da construcziun bassa dal Grischun.
RR novitads 11:00