L'iniziativa cunter la chatscha speziala duai vegnir declerada sco valaivla, scriva la partida liberaldemocrata PLD grischuna en ina communicaziun, quai malgrà ch’ella refusa l’iniziativa.
Tenor ina expertisa da la regenza grischuna cuntrafa l'iniziativa cun il dretg federal. La regenza vul perquai declerar l'iniziativa sco nunvalaivla.
PLD beneventa concordat da sport
La PLD beneventa plinavant ch'il Grischun fa part dal concordat per mesiras cunter violenza ad occurrenzas da sport. La cumplettaziun dal concordat prevesa in obligaziun da permissiun per gieus da ballape e hockey da ligas naziunalas. En il Grischun pertutga quella sulet il club da hockey da Tavau.
