Medemamain èn las organisaziuns da pumpiers vegnidas reducidas marcantamain; da 238 sin actualmain 60 organisaziuns. Il fatg principal ch'ha lubì questa reducziun è che la scolaziun e la mobilitad dals pumpiers èn creschidas. En connex cun questa mobilitad èn era ils cunfins da vischnancas curdads. Sco quai che Hans Ueli Roth, l'inspectur da pumpiers dal Grischun ha detg ad RTR, èn las organisaziuns da pumpiers betg pli mo per ina singula vischnanca, mabain per entiras regiuns.
Pumpiers pli effizients che pli baud
Malgrà questas reducziuns marcantas da resursas umanas e d’organisaziuns sco talas, è la forza dals pumpiers creschida. Quai ha da far cun il sistem d’alarmar pli effizient e l'entir equipament dals pumpiers.
Tut las organisaziuns da pumpiers èn equipadas cun autos da cisterna e cun protecziun da flad. La collavuraziun ha pussibilità da reducir era là nua ch’i n'ha betg dà fusiuns da vischnancas
Quels che fan pumpiers ston però proteger pli gronds intschess, quai che munta ch'els vegnan pli savens en funcziun. L'onn passà èn ils pumpiers grischuns stads 1'020 giada en acziun. Quai vul dir ch'umens e dunnas che fan pumpiers èn vegnids clamads or da letg u davent da chasa ed a la lavur per far servetsch da pumpiers. La paja per quai engaschi survegnan els mintgamai en furma dal sold da la vischnanca pertutgada.
Ils manaschis che ston desister da lur lavurers e lavureras vegnan betg indemnisads. Sco quai che Hans Ueli Roth di, è l'instituziun da pumpiers in'insitutziun da principi gratuita che mintgin ha dabun. I dettia fitg paucs problems cun manaschis pervi da questa chaussa. Forsa haja quai era da far cun il fatg che mintga patrun sa ch'i pudess era brischar ina giada tar el.