Oz ha cumenzà in project da pilot che scumonda da fimar a la staziun. Pertutgada dal scumond è la staziun da Cuira sco era las staziuns da Basilea SBB, Bellinzona, Neuchâtel, Nyon e Turitg Stadelhofen. A Cuira vegn il test manà en collavuraziun cun la Viafier retica e La Posta.
Sch'ils resultats dals tests che duran intgins mais èn positivs, vulan ins introducir il scumond da fimar a la staziuns en l'entira Svizra.
Pli segiras e pli schubras duain las staziuns vegnir
Cun il scumond vulan ins promover la segirezza e la schubradad a la staziun. Er la qualitad da viagiar ed il bainstar dals clients che èn da viadi cun ils meds publics duai sa meglierar.
Adina daplirs viagian durant ils temps da grond traffic cun il tren. Bleras persunas spetgan damai spess in sper l'auter sin il tren. Sco consequenza hai adina puspè da cas, nua che la pel u la vestgadira d'insatgi è vegnida brischada. Quai vulan ins evitar. Ma er l'ambient e la schubradad pateschan: Blers fimaders bittan lur stumbels sin ils binaris ni la rodaglias, enstagl en ils tschendrers.
Differentas reacziuns
Per ils ins èsi cler: In scumond per l'entira staziun è il sulet gist. I dat dentant era quels che chattan quai sezs ina buna chaussa, chapeschan però era, che quai è tup per ils fimaders. I na duess betg daventar ina discriminaziun dals fimaders. E lura datti era quels, ch'èn da l'avis, che quai saja ina idea tuppa, perquai ch'i funcziuneschia bain era senza scumond.
RR actualitad 11:00
