La campagna da prevenziun d'accidents cun motos «smartrider.ch» ha durà trais onns. Uss vegn ella remplazzada cun la campagna «stayin-alive.ch» per promover il pensar da segirezza en connex cun manischar ina moto.
Durant la stagiun principala da motos, dal matg fin l'october, vegnan montads placats da la segirezza dal traffic per lung dals trajects da moto ils pli frequentads e nua ch'i capitan blers accidents, scriva la polizia.
Nova campagna – meds cumprovads
La campagna «smartrider.ch» vegn substituida tras la campagna «stayin-alive.ch». La campagna da motos «stayin-alive.ch» dal Post da consultaziun svizzer per la prevenziun d'accidents (ppa) cumenza – cun motivs actualisads – ses terz onn.
Ultra da la nova campagna da prevenziun sa basa la Polizia chantunala dal Grischun dentant vinavant sin quai ch'è sa cumprovà:
- mesiras repressivas (p.ex. controllas da sveltezza)
- utilisaziun dal potenzial da la construcziun da vias (p.ex. trajects ch'èn meglier renconuschibels)
- lavur da prevenziun (p.ex. acziun da placats ed acziuns sin pass e tar lieus d'accidents)
160 accidents da moto sin vias grischunas
Ils pass sur las Alps sco er cuntradas e trajects attractivs fetschian ch'il Grischun saja ina destinaziun d'excursiuns bainvegnida, constatescha la polizia. Quai na valia betg mo per viandants e ciclists, mabain er per motociclists. L'onn 2015 haja quai dà sin las vias dal Grischun passa 160 accidents cun motos.
Legraivlamain haja quai dà damain accidents mortals cun motos che l'onn precedent. En la gronda part dals accidents era la via sitga e l'aura buna. Tar radund 120 accidents cun la moto sajan ils motociclists stads sezs la culpa.
RR novitads 09:00