Il Grischun ha memia paucs veterinaris, di Urs Iselin, il president da la societad grischuna da veterinaris. En la part sura da la Surselva vegn pensiunà en dus onns il veterinari d’animals da niz. Enfin ussa n’ha el betg chattà in successur. En il mender cas n’hai lura nagin veterinari per animals da niz davent da Trun enfin l'Alpsu. Ina situaziun sumeglianta datti era en il Puschlav ed en il Grischun Central.
Lavur corporalmain severa e pajada mal
Las raschuns per la mancanza èn multifaras. Dals 120 novs veterinaris svizzers ad onn èn 90% dunnas. Cura che quellas vegnan mamma, lavuran ellas mo pli parzialmain. Quai funcziuna sco veterinaria d’animals da chasa, sco veterinaria d’animals da niz dentant betg. La lavur da veterinaria d’animals da niz è corporalmain severa, pajada mender ed il temp da lavur e fitg irregular. E lura chattan paucs veterinaris la via en il Grischun.
Praticants e praticantas èn stads intgantads dal tuttafatg dals animals da niz, han gì plaschair ed han giudì la lavur, ma insaco èn tut quels ids a perder.
Mancanza fatschenta er il Cussegl grond
Sin palancà naziunal vegn uss empruvà da scolar dapli veterinaris e veterinarias. Il chantun stoppia sustegnair veterinaris d’animals da niz en la periferia, pretenda Urs Iselin, president da la societad grischuna da veterinaris. Il problem chatta era la via en il Cussegl grond. Durant l’ura da dumondas vuless Reto Crameri, deputà da la PCD e sez pur, savair da la regenza, co ella vesa il problem e sch’ella è pronta da far insatge.
Cuminanza da lavur tschertga soluziuns
Sumegliants problems enconuschan era ils chantuns Tessin, Uri, Giura e Berna. Uschia han ils Grischuns uss furmà ina cuminanza da lavur cun la Part Sura Bernaisa per chattar soluziuns.
RR actualitad 12:00