La PBD grischuna ha pudì limitar las perditas tar las elecziuns parlamentaras. La finala perdan ils Burgaisdemocrats 4 dals totalmain 27 mandats da fin uss. Dus dals 4 sezs dal segund scrutini van a la PBD e mintgamai 1 a la PCD e la PLD. L'ierarchia tenor fermezza da fracziun en il Cussegl grond resta tuttina sco il 2014.
Schiers: PLD «engola» sez da la PS
En il circul da Schiers han cumbattì 4 candidats per il 3. sez d'occuppar – il sez ch'ils Socialdemocrats avevan. Conquistà il sez ha Peter Hartmann (PLD, 498 vuschs) avant , Luzi Stadler (PS, 286 vuschs) e Hansjörg Ziegler (PPS, 148). Marcel Conzett (PBD) n'ha betg pli candidà.
Jenaz e Suot Tasna: PBD defenda ses sez
En il circul da Jenaz ha Erhard Simon (PBD) spendrà il sez per la partida cun 319 vuschs. Il cuntracandidat Werner Bär-Bühler (PLD) ha fatg 261 vusch. Gia l'emprim scrutini era Erhard ordavant cun mo 1 vusch sut il pli absolut da 217.
En il circul Suot Tasna è elegì Men-Duri Ellemunter da la PBD cun 360 vuschs e segirescha uschia in ulteriur sez en il parlament grischun als burgaisdemocrats. Ses cuntracandidat liberaldemocrat Michael Roth ha survegnì 218 vuschs.
Lumnezia: Schmid per Caduff
En il circul da Lumnezia è in dals 2 sezs stà vacant, perquai che Marcus Caduff è vegnì elegì en la regenza. Elegì è Stefan Schmid (PCD, Val Son Pieder) cun 451. Curdin Capeder (PCD, Cumbel) ha stuì ceder cun 223 vuschs.
Dapi ch'il circul Lumnezia ha mo pli 2 sezs (2010) è Schmid l'emprim represchentant da Val en il Cussegl grond.
-
Bild 1 von 5. Peter Hartmann (PLD, Schiers) engola il sez dals Socialdemocrats. Bildquelle: mad.
-
Bild 2 von 5. Stefan Schmid (PCD, Val Son Pieder) suonda a Marcus Caduff. Bildquelle: mad.
-
Bild 3 von 5. Simon Erhard (PBD, Furna) defenda il sez per la partida. Bildquelle: mad.
-
Bild 4 von 5. Men-Duri Ellemunter spendra in sez per la Partida burgaisdemocratica en il circuit Suot Tasna. Bildquelle: mad.
-
Bild 5 von 5. La fermezza da partidas en il Cussegl grond. Bildquelle: RTR.
RR novitads 11:00