Il material d'instrucziun tracta a moda adequata per il stgalim bass, mesaun e superiur las ovras da la misericordia, pli exact: las 7 ovras corporalas da la misericordia. Quai èn bunas ovras tranter carstgauns sco per exempel: dar da mangiar a quels che han fom, visitar malsauns u era prender si esters. Il mument datti pir ils fegls da lavur che tractan las ovras corporalas, pli tard suonda lura il material d'instrucziun per las 7 ovras moralas sco per exempel consolar ils tribulads e contristads, curreger quels che fan putgà u cussegliar quels che dubitan.
Misericordia è in bel pled, ma el ha si in pau pulvra. Igl è bun da s'occupar da la misericordia.
Ils fegls da lavur tractan il tema fitg chapaivel e simpel, la teoria vegn colliada cun la pratica, ils uffants duain vesair il connex da l'ovra misericordaivla cun la vita da mintgadi. Il material porscha bunas ideas, è attractiv cun ligns da pleds, texts cun e senza largias u era maletgs per colurar. Adina puspe cumpara la dumonda: Tge poss jau far mez?
Per il stgalim mesaun e superiur èn las ovras da la misericordia era colliadas cun passaschas correspundentas ord la Bibla. Ils giuvenils duain era s'occupar cun dumondas sco: Poss ti perdunar a persunas che han fatg dal mal a tai? Has ti era gia ponderà sche ti pudessas esser misericordaivels envers ils sbagls da tes concarstgauns? Tge patratgas ti da persunas ch'èn en praschun? Co vas ti enturn cun glieud estra, cun fugitivs?
L'idea per il material d'instrucziun saja vegnida en vista als temas actuals dals fugitivs, il terror islamic u era co la publicitad giaja enturn cun il tema «religiun», di Giuseppe Gracia, il pledader da l'uvestgieu.
RR Actualitad bunura 06:00