Entaifer ils proxims trais onns vul la Retica stgaffir 30 novas plazzas. 17 da quellas en la sparta d'infrastructura, vul dir per bajegiar, renovar e sanar. Plinavant datti intginas plazzas d'inschignier a Cuira, 10 plazzas tar il mantegniment dals trens a Landquart e trais plazzas en la sparta da marketing e vendita.
Sfida da gudagnar la glieud
Crear las novas plazzas saja ina – occupar ellas in'autra. Tenor Engler vegni ad esser ina gronda sfida d'occupar las plazzas.
Cur che la fasa d'investiziuns saja tras vegnia il dumber da persunal però tut tenor er puspè reducì. Capitar duai quai però betg cun stritgar plazzas, mabain cun betg pli remplazzar glieud che va en pensiun. Quai han confermà tant ils responsabels da la Retica sco er il sindicat dal persunal.
La Viafier retica ha er communitgà l'avant mezdi, ch'ins haja transportà dapli passagiers quest onn. Cumpareglià cun l'onn avant èn 3,9% dapli passagiers viagiads cun la Retica.
RR actualitad 17:00