Avant paucs dis ha il constructur Stadler Altenrhein furnì l’emprima cumposiziun dal nov tren a Landquart. En tut ha la RhB cumprà sis trens à mintgamai set parts.
En funcziun a partir da stad 2017
Il nov tren resguarda ils basegns da persunas cun impediments tenor lescha. Plinavant ha il tren in cumpartiment per uffants ed in per fotografs cun fanestras da panorama.
La primavaira 2016 cumenzan ils viadis da test, avant che l’emprim tren cursescha lura a partir da l’avust 2016 tenor plan.
Si e giu en l'onn da fatschenta 2015
L’onn da fatschenta actual è marcà dal ferm franc sco era dal turissem flaivel, communitgescha la Viafier retica. Perquai fa l’interpresa quint cun in minus da las entradas da radund 3 milliuns francs per la sparta dal traffic da persunas (-3 fin 4%). Malgrà questa sperdita duai il quint esser levamain positiv.
Auter vesa quai ora per il transport da rauba: Qua spetga la RhB in lev augment d’in mez milliun francs cumpareglià cun l’onn avant. Areguard il transport d’autos duain las cifras da l’onn passà vegnidas cuntanschidas.
Projects gronds van avant tenor plan
Plinavant communitgescha la Viafier retica ch’ils projects gronds van avant tenor plan. Quai pertutga la construcziun dal nov tunnel da l’Alvra, tar la quala las lavurs èn tar radund 210 meters a Preda e radund 80 meters a Spinas.
-
Bild 1 von 13. In char da l'emprima classa. Bildquelle: RTR, G. G. Flepp.
-
Bild 2 von 13. Sezs comfortabels en l'emprima classa. Bildquelle: RTR, G. G. Flepp.
-
Bild 3 von 13. En l'emprima classa èn las storas automaticas ed i dat glisch supplementara per mintga plaz da seser. Bildquelle: RTR, G. G, Flepp.
-
Bild 4 von 13. Quai n'hai anc mai dà tar la Viafier Retica - in char per famiglias. Bildquelle: RTR, G. G. Flepp.
-
Bild 5 von 13. In pitschen chantun da tarmagliar per ils uffants. Bildquelle: RTR, G. G. Flepp.
-
Bild 6 von 13. La cumposiziun da tren cuntegna da nov in char multifucziunal per ubain seser, farmar chars d'uffans e velos ni... Bildquelle: RTR, G. G. Flepp.
-
Bild 7 von 13. ...schizunt la pussaivladad da montar cuschinas pitschnas per il bainstar dals giasts. Bildquelle: RTR, G. G. Flepp.
-
Bild 8 von 13. Ils chars da secunda classa sumeglian a quels dals novs trens Allegra che charreschan gia. Bildquelle: RTR, G. G. Flepp.
-
Bild 9 von 13. Ina tualetta pitschna che porscha da nov er... Bildquelle: RTR, G. G. Flepp.
-
Bild 10 von 13. ...in pissoir ed indrizs moderns per sientar ils mauns. Bildquelle: RTR G. G. Flepp.
-
Bild 11 von 13. En la part cun entradas bassas hai er ina gronda tualetta per persunas cun impediments. Bildquelle: RTR. G. G. Flepp.
-
Bild 12 von 13. Er quai n'hai anc mai dà: in char special per fotografs. Las fanestras grondas pon ins avrir electronicamain. Bildquelle: RTR, G. G. Flepp.
-
Bild 13 von 13. Stefan Engler, il president dal cussegl d'administraziun da la Viafier retica, avant la porta dal nov tren. Bildquelle: RTR, G.G.Flepp.
Er la sanaziun dal tunnel da Glatschera va bain enavant, ha fatg a savair l'interpresa. Il project da pilot custa ca. 17 milliuns francs. La reconstrucziun da la staziun a San Murezzan duai esser terminada il 2017 fin il campiunadi mundial da ski alpin. Ella custa totalmain 67 milliuns francs.