1'500 persunas senza lavur

Il fanadur ha il Grischun nudà 1'464 persunas senza lavur. Quai correspunda ad ina quota da dischoccupaziun da 1,3%. Cumpareglià cun il mais zercladur è il dumber sa reducì per 198 persunas.

3 persunas spetgan avant il spurtegl da l'uffizi da lavur Bild in Lightbox öffnen.

Legenda da maletgs: Il Grischun ha nudà damain persunas senza lavur il fanadur. (maletg simbolic) Keystone

Da las persunas senza lavur eran 649 dunnas ed 815 umens. Las bleras persunas derivan ord las branschas gastronomia (351), industria da construcziun (153), il commerzi en detagl (122) e la sparta sanadad (100).

Lavur curta

Il mais passà han 9 manaschis cun totalmain 140 emploiads introducì lavur curta. Cumpareglià cun il mais avant è il dumber sa reducì. Il zercladur avevan 13 manaschis cun 173 lavureras e lavurers fatg lavur curta.

En l'entira Svizra eran il fanadur radund 134'000 persunas senza lavur. Quai èn bunamain 500 dapli ch'il mais avant. La quota da dischoccupaziun è stada constanta tar 3,1% - sco il Secretariat da stadi per l'economia SECO scriva. Cumpareglià cun l'onn avant è il dumber da dischoccupads creschì per 5,3%.

RR novitads 08:30