In onn suenter l'aboliziun da la garanzia dal curs da l'euro vers il franc èn las opiniuns davart l'aboliziun dal curs minimal da l'euro spartidas: l’economia ha fatg memia blers quitads; per il turissem na vesa quai però betg or uschè bain.
Gudogn da record per la Hamilton
Cun 2 fin 3% sperdita ha Andreas Wieland, il schef da la Hamilton a Panaduz, quintà avant in onn. Mo sia bilantscha vesa oz ora tut auter: La firma ha fatg in gudogn da 9% - uschè bler sco anc mai en l’istorgia da la Hamilton.
Quai resultat saja cunzunt d’engraziar la restructuraziun da la fatschenta sco era al grond engaschi dals collavuraturs, di Wieland.
Bler pli paucs turists da l’exteriur
Auter vesa quai ora tar il turissem grischun. Bunamain 11,3% pli paucs turists da la Germania haja quai gì l’onn passà, quai di Marcel Friberg, il president da Grischun Vacanzas. La purschida dal turissem è avant in onn vegnida davent in mument sin l’auter 10-15% pli chara ch’èn ils pajais ordaifer.
Era la bella stad n’haja betg pudì salvar questas cifras. Marcel Friberg appellescha a la Banca naziunala svizra d’introducir da nov in curs minimal per l’euro. Dentant smina el che quest appel vegnia a restar senza success.
RR Actualitad 06:00/11:00/17:00
