Siglir tar il cuntegn

Header

cuntegn

100 dis en uffizi Ils presidents da Claustra, Tavau e da la Stussavgia

L'emprim socialdemocrat

Dapi 100 onns è Philipp Wilhelm l'emprim socialdemocrat che ha interrut l'èra da politichers burgais a la testa da la vischnanca da Tavau. En ses emprims 100 dis sco landamma è el gia s'occupà cun differentas fatschentas. Per l'ina vul la vischnanca reducir la taxa da turissem per sustegnair firmas che pateschan da corona, lura vul Tavau sparter en intgins lieus trails da bike e vias da viandar, e lura è el anc occupà cun numerusas investiziuns. La pli gronda è la spustada da la staziun da Tavau vitg inclusiv revitalisar il nov quartier. Lura duai era dar in plaz enstagl d'in parcadi tar las arcadas e la promenada duai vegnir pli bella. In'autra investiziun che la vischnanca ha planisà è en il center da scienza CERC.

Malgrà la pandemia saja il 2021 il dretg onn per far talas investiziuns, perquai che «la fin finala sustegn quai nossa economia locala sche nus faschain investiziuns», di il giuven landamma Philipp Wilhelm.

Stizzar fieus a Claustra

Hansueli Roth è il nov president da Claustra – el è in um enconuschent, avant sia pensiun era el numandamain 24 onns ditg il pli aut pumpier dal chantun. Uss stizza el ils fieus politics en vischnanca. Il pli grond fieu saja la disfidanza da la populaziun en las autoritads. Anc l'onn passà han passa 700 abitantas ed abitants da Claustra suttascrit in'iniziativa che duai instradar in'examinaziun administrativa che pretenda che la cumissiun da gestiun guardia sin la detta a la vischnanca. Che la populaziun da Claustra na fida betg las autoritads ha ella er mussà cun eleger Roth al timun. El ha fatg passa 1'600 vuschs, entant che ses concurrent e president da lezzas uras Kurt Steck ha fatg be 134 vuschs.

Uss prenda Roth enta maun las fatschentas da Claustra, la pli gronda saja – dasper gudagnar enavos la fidanza da la populaziun – da dumagnar la revisiun da la planisaziun dal territori. Quella cuzzia gia radund 10 onns e Roth vul en sia legislatura purtar quella ad ina fin. Vinavant stattan insaquantas investiziuns sin rucca. Per exempel vul Claustra renovar la staziun ed il sutpassadi. Co quai va enavant cun il grond project dal resort «Ober Ganda» n'è anc betg cler e dependia dals investiders. La vischnanca beneventass dentant il project.

Vegnì per restar e communitgar

El saja daventà president mo cun il sustegn da sia dunna, raquinta Lukas Züst, ch’è vegnì avant dus onns ad abitar a Versomi. Communicativ, direct ed interessà vi da la glieud, uschia descriva sia dunna l’um da 32 onns. Insatge ch’el fetscha simplamain gugent, cuntinuescha il bab d’ina figlia da 3 mais, saja da s’inscuntrar cun autras persunas e da vegnir a savair uschia dapli dals quitads ma era en general. Uschia saja er ses stil da manar: «tadlar tiers, discurrer e s’interessar per chaussa e persuna». Ed in grond avantatg saja per el e sia dunna, ch’els sajan era vegnids a Versomi per restar qua e betg per stuair restar.

Jau sun fitg communicativ e nuncumplitgà.
Autur: Lukas ZüstPresident communal Stussavgia

Artitgels legids il pli savens

Scrollar a sanestra Scrollar a dretga