Siglir tar il cuntegn
cuntegn

Chantun 100 onns hotelleriesuisse Grischun – in sguard anavos

Schegea ch'i dat anc blers hotels en il chantun Grischun, l'hotellaria n'ha betg pli la valur sco pli baud. Il giubileum da 100 onns è dentant motiv avunda da dar in sguard enavos en l'archiv e dar in'egliada sin istorgias da success dals hotels en il Grischun.

Legenda: Guardar il video 100 onns hotellerie suisse Grischun. Durada 03:04 minutas.
Or da Telesguard dals 01.02.2019.

Durant il 20avel tschientaner aveva l'hotellaria en il Grischun renum mundial. Ditg valeva il chantun sco il lieu per excellenza da far vacanzas, cunzunt l'enviern. Uss èn ins dentant mo pli in tranter plirs.

Nus eran ina giada numer in sin l'entir mund e vain pers quai ad autras destinaziuns.
Autur: Ernst Wyrschpresident hotelleriesuisse Grischun

Ins veglia dentant puspè reconquistar il renum da pli baud. Ord il passà sappian ins emprender co ch'i vegniva lavurà cun passiun. Ins stoppia dentant era prender cun ins la midada tecnologica per puspè avair grond success.

Hotels da success èn svanids

In sguard en l'archiv mussa che l'hotellaria Grischuna ha per exempel gì grond success a Mustér cun l'hotel Acla da Fontauna. Bleras persunas da la Belgia pudevan là passentar lur vacanzas da skis a moda favuraivla. Ed er ils indigens han pudì profitar, uschia devan purs per exempel scola da skis als giasts l'enviern.

Er l'hotel renumà a Vulpera, il Waldhaus na datti betg pli. Quel è brischà l'onn 1989. L'hotel a Scuol era cunzunt renumà per il turissem da far bogn. Schizunt il scriptur Friederich Dürrenmatt aveva da ses temps passentà in temps a Vulpera.

RR actualitad 17:00