Siglir tar il cuntegn

Header

Navigaziun

cuntegn

Chantun 16 partidas da schah il medem mument

Betg en il tennis, currer u golf mabain en dar schah tutga Nico Georgiadis tar ils megliers. A chaschun da l'exposiziun speziala da la Higa davart il schah ha el fatg ina visita a Cuira la fin da l'emna vargada.

Ils 16 giugaders dal club da schah Cuira che sa mesiran cun Nico Georgiadis èn da tut las vegliadetgnas. Avant ch'entschaiver in gieu salida el mintga adversari cun dar il maun. Silsuenter fa el l'emprima tratga e sa mova uschia vinavant da tavla tar tavla. Talas èn arranschadas en ina furma dad in U per ch'i saja pli simpel da vegnir vinavant. La pli gronda difficultad saja il temp, declera Nico Georgiadis.

Jau hai 90 minutas temp tar tut las tavlas e sun tar circa set adina vidlonder. Tar questas tavlas passa mes temp.
Autur: Nico GeorgiadisGiugader da schah

Uschia sa mova il giuven da 23 onns pulit speditiv dad ina tavla a l'autra. Uras cun nufs inditgeschan il temp che mintga vart ha anc a disposiziun per il gieu.

Silenzi e la dretga strategia

Ils participants paran d'esser approfundads en il gieu – i na vegn strusch discurrì. Tranteren vegni scutinà in u l'auter cussegl en l'ureglia dal vischin. Uschiglio audan ins be ils nufs da las uras che vegnan smatgads e las figuras che sa tschentan sin las tavlas. I sto bain ir spert, dentant n'ageschan ils giugaders betg hectic. Mintga tratga para d'esser bain ponderada e calculada exactamain. Nico Georgiadis dovra mintgatant era pli ditg per ponderar ses proxim pass. Per quests gieus simultans haja el ina strategia.

Sche la situaziun tar ina tavla n'è betg uschè buna, pos jau giugar pari. Uschiglio perd jau bler temp ed energia per in gieu. Lura esi meglier d'offrir u far in pari – per pudair sa focussar era sin tschellas partidas.
Autur: Nico GeorgiadisGiugader da schah

Buna memoria e concentraziun

Runda per runda va il maister da schah enturn e creescha cun sias tratgas mintgamai ina nova sfida per ses adversaris. El haja anc circa en memoria tge ch'è succedi sin tge tavla en la runda precedenta e tge ch'el ha pensà lura. Tut quai dovria gronda concentraziun.

Jau percorsch nagut auter enturn mai.
Autur: Nico GeorgiadisGiugader da schah

L'abilitad da pudair sa concentrar bain è tenor Nico Georgiardis perfin la pli impurtanta abilitad per dar schah.

RR actualitad 07:00