Siglir tar il cuntegn

Header

Navigaziun

cuntegn

Chantun 168 milliuns francs gudogn per Banca Chantunala Grischuna

La Banca Chantunala Grischuna BCG ha realisà l'onn da fatschenta 2015 in meglier resultat che spetgà. Sco l'institut da finanzas communitgescha, saja il gudogn s'augmentà per 4,4% sin 168,2 milliuns francs.

Cun quest gudogn paja la banca ina dividenda da 38 francs, sco gia l'onn passà.

Il president da la banca, Peter Fanconi, accentuescha ch'ins haja realisà in bun resultat malgrà las cundiziuns generalas pli difficilas. Cun persequitar consequentamain la strategia tschernida e cun in management da ristgas effectiv haja l'institut dentant pudì suandar las finamiras, scriva la BCG.

Damain retgav e custs

En l’emprima mesadad da l’onn passà ha la banca fatg cun sia participaziun a la Swisscanto in gudogn da vendita da bunamain 17 milliuns francs. Quai surpli saja ì directamain a las reservas per ristgs generals, scriva la BCG.

Il retgav da fatschenta è cun 369 milliuns francs pli bass che quel da l’onn passà (-2,9%). Medemamain pli bass èn dentant er ils custs da fatschenta, numnadamain 175 milliuns francs (-1,3%). Cun sia fatschenta principala da tschains ha la banca gudagnà 230 milliuns francs damain che l’onn avant.

2016: banca quinta cun gudogn stabil

Al fond da contribuziun per projects nuncommerzials sco cultura, util public, sport, economia, turissem e societad èn danovamain vegnids assegnads 2 milliuns francs.

Per l'onn da gestiun 2016 ha il president da la banca la ferma speranza da pudair cuntinuar cun il curs da creschientscha sco enfin qua. En la fatschenta d'emprests quinta la banca per l'onn da gestiun current cun in augment d'ina mesa milliarda francs. Plinavant spetga ella l'afflussiun da novs daners da 200 milliuns francs.

Gudogn da la Banca Chantunala Grischuna

Las cifras inditgadas reflecteschan il gudogn da l'entir concern, avant reservas e senza cumparts minoritaras.
Onn

Gudogn
(en milliuns CHF)
Quota d'agen chapital
(en pertschient)
Facultad dals clients
(en milliardas CHF)
2011181
11,626,8
201218011,128,3
201318511,229,5
201417911,430,2
201518910,330,1

Las cifras inditgadas reflecteschan il gudogn da l'entir concern en milliuns francs, avant reservas e senza cumparts minoritaras. La facultad dals clients è excl. cash management. Funtauna: Banca Chantunala Grischuna.

Dispita da taglia cun la Germania

L’onn 2015 ha la BCG schlià e terminà la dispita da taglia cun ils Stadis Unids da l’America. La BCG ha pajà ina multa da 3,6 milliuns francs ed ha gì nagina influenza sin il quint 2015. La banca aveva mess da la vart reservas per questa multa.

Actualmain datti anc la dispita da taglia tranter la Svizra e la Germania. Qua na datti anc nagina cunvegna. La direcziun da la banca chantunala quinta ch’i dettia quest onn in svilup en las contractivas e quinta er da stuair pajair ina multa. Alois Vinzens ha sincerà a la conferenza da medias, ch’els sa preparian sin ina summa.

Cunquai ch’igl è ina procedura anc betg terminada ha el dentant betg vulì tradir dapli.

RR novitads 07:30 / 12:00