2,1% damain pernottaziuns en il Grischun

L’hotellaria grischuna ha registrà l’onn passà 109’000 pernottaziuns pli pauc ch’il 2013. Quai è in minus da 2,1%.

Ina chombra d’hotel cun in letg ed ina maisa pitschna cun duas scadiolas da café e dus mails. Bild in Lightbox öffnen.

Legenda da maletgs: Il Grischun ha registrà damain pernottaziuns. Keystone

Positiv è il svilup per il december passà. Là han 2,5% dapli persunas passentà la notg en in hotel grischun. Patì marcantamain ha dentant Savognin, là han ins stuì registrar in minus da prest 23%.

Mo il Tessin cun in minus da 3,8%, ha registrà ina diminuziun anc pli gronda.

Dapli giasts en Svizra

En l’entira Svizra è il dumber da pernottaziuns creschì l’onn passà en media per 1% sin 35,9 milliuns pernottaziuns. Quai èn 310’000 pernottaziuns dapli ch’il 2013. Tenor l'Uffizi federal da statistica ha il dumber dals giasts indigens per l'emprima giada il nivel da 16 milliuns. Cun excepziuns dals mais favrer, zercladur e fanadur ha la hotellaria svizra registrà mintga mais in plus da pernottaziuns.

Prognosa pertutgant ferm franc svizzer

Sch'il franc avess da restar vinavant uschè ferm quinta Svizra turissem che las pernottaziuns en l'hotellaria alpina pudessan tschessar a vista mesauna per enfin 10%.

Sco igl è vegnì ditg a la conferenza da medias annuala il glindesdi, saja ina raschun che las destinaziuns alpinas attirian mo paucs giasts da las fieras lontanas sco per exempel da la China. Las citads sajan probabel pertutgadas damain da quest svilup.

RR novitads 10:00