Siglir tar il cuntegn

Header

Navigaziun

La nova pendiculara da las pendicularas Scuol Motta Naluns cun vista vers S-charl.
Legenda: Ils pretschs per meter d’autezza varieschan fermamain tranter las singulas pendicularas grischunas. ANR, B. Stecher
cuntegn

Chantun 2.79 raps per mintga meter d‘autezza

Per ascender in meter d‘autezza cun pendicularas grischunas la stad ston ins pajar in tras l’auter 2.79 raps. Quai resulta sch’ins cumpareglia ils pretschs per viadis singuls per ina persuna creschida senza bigliet da mesa taxa u auters rabats.

Ils pretschs varieschan relativamain ferm tranter il traject il pli char cun 7.73 raps per meter d’autezza (San Murezzan Vitg – Chantarella) ed il pli bunmartgà cun strusch 1 rap (Älplibahn Malans) per meter d’autezza. Questa differenza sa mussa era sch’ins cumpareglia las regiuns. In tras l’auter pajan ins en la regiun Engiadina / Grischun dal sid il pli bler, en la regiun Grischun central il pli pauc.

Il pli bler pajan ins per meter d’autezza en Engiadina / Grischun dal sid.
Legenda: Il pli bler pajan ins per meter d’autezza en la regiun Engiadina / Grischun dal sid. RTR, M. Decurtins

Cartas dal di favuraivlas

Ils pretschs per meter d’autezza resguardan be la differenza d’autezza tranter l’autezza da la staziun a munt e la staziun a val. Autras influenzas sin il pretsch sco confort, purschida sper il transport sco tal ni celebritad dal traject na vegnan betg respectads.

Che la regiun Grischun Central ha il pretsch en media il pli bunmartgà per meter d’autezza ha era da far cun cartas dal di favuraivlas. Ad Arosa (18 francs il di) ed a Savognin (10 francs il di) remplazzan quellas ils bigliets singuls e smatgan uschia sin quasi tuts trajects il pretsch a bas.

Blers na sentan gnanc ils pretschs

Ils bigliets singuls per ascender cun las pendicularas a munt hajan blers gnanc da pajar, manegia il president da las Pendicularas Grischunas Silvio Schmid: «Giasts cun segundas abitaziuns en las regiuns ed indigens han savens las chartas da l’onn per las pendicularas.» E quellas cumpiglian dapi intgin temp era la stad. Anc pli favuraivel vegn l’ir a munt cun pendicularas sch’i dat ina charta da la regiun sco la Ela Card. En quella èsi inclus da nizzegiar las pendicularas da Savognin durant la stad.

La fatschenta da stad è in servetsch per il giast.
Autur: Silvio Schmidpresident Pendicularas Grischunas

La fatschenta da stad saja per las bleras pendicularas grischunas ina fatschenta plitost deficitara, di Silvio Schmid. I dettia bain intginas excepziuns sco per exempel Lai che fetschia bunas fatschentas cun velocipedists. Uschiglio saja il manaschi da stad plitost «in servetsch per ils giasts», uschia Schmid.

Pretschs grischuns en il rom dal rest

Sch’ins cumpareglia ils pretschs grischuns per meter d’autezza sche sa movan quels en il rom dal rest da la Svizra. Per ascender cun pendicularas per exempel sin il Pilatus, pajan ins 4.67 raps il meter. Auters trajects enconuschents en Svizra, sco quel da Stans fin al Stanserhorn, èn dentant sut la media grischuna.

Per ascender al Stanserhorn pajan ins 2.64 raps il meter d’autezza. Ed era anc per cumparegliar: La Jungfraubahn, la pendiculara resp. il tren che vala sco in dals chars per ir a munt, custa 4.45 raps il meter d’autezza (quintà cun in bigliet da la Kleine Scheidegg fin sisum al Jungfraujoch).