Il Cussegl naziunal vul che las butias han avert en l'entira Svizra da las 06:00 uras fin las 20:00 uras durant ils lavurdis e da las 06:00 uras fin las 18:00 uras la sonda. Ils delegads e las delegadas da la secziun grischuna dal sindicat Unia èn dentant dal maini ch'il commerzi en detagl na dovri betg pli lungs temps d'avertura. Ils grossists sajan ils sulets che profitassan.
Per pli autas rentas
Tenor ils delegads e las delegadas grischununas da l'Unia è l'AVS sauna ed i cumportia in auzament da 10% sco quai che l'iniziativa da l'uniun sindicala da la Svizra propona. Quai saja pussaivel da finanziar. Tranter auter er cun in auzament moderau da las contribuziuns da la paja. Las partidas burgaisas, patruns ed il Cussegl federal fetschian be tema.
Nova structura - pli pauc gruppas localas e nova manadra
Ultra da las duas resoluziuns ha la radunanza da delegads decidì da restructurar ed uschia far pli efficient la secziun. Enfin uss devi 4 gruppas localas en il Grischun (Cuira, Engiadina, Partenz e Surselva). Da nov crodan la Surselva ed il Partenz davent.
Plinavant è Anke Gähme sa preschentada sco nova manadra da la regiun Svizra orientala. Ella succeda a Thomas Wepf che dat giu ses post per motivs da vegliadetgna. Er sa preschentà è Simon Suter sco nov manader da l'Uniun sindicala dal Grischun. President da la secziun grischuna da l'Unia resta vinavant Walter Kohli.
RR novitads 10:00