20 milliuns deficit per il Grischun en il 2017

Barbara Janom Steiner preschenta il budget dal chantun Grischun per l'onn 2017. La situaziun finanziala dal chantun saja equilibrada.

gr Cumparegliaziun da budget e quint dal chantun Grischun

La regenza grischuna ha preschentà il budget per il 2017. Quel prevesa in deficit da circa 20 milliuns francs. La situaziun finanziala dal chantun saja equilibrada.

Il Grischun budgetescha 20 milliuns francs minus pel 2017

1:40 min, Telesguard dals 27.10.2016

Las investiziuns planisadas dal chantun èn cun 273 milliuns francs uschè autas sco anc mai. Era per vias vul il chantun investir l'onn che vegn passa 350 milliuns francs.

Per ils onns proxims quinta la regenza cun deficits adina pli auts, uschia il 2020 circa 96,4 milliuns francs.

Reducziun da taglias per persunas giuridicas

En vista a la situaziun economica difficila propona la regenza perquai da sbassar las taglias per persunas giuridicas.

Cun ina tala meglieraziun da taglia per interpresas pudess l’economia en il Grischun vegnir rinforzada, scriva la regenza.

Las persunas giuridicas duain tenor il budget profitar d'ina reducziun dal pe da taglia. Sin nivel chantunal fiss quai ina reducziun da 10% sin nov 90%. Er las vischnancas fissan pertutgadas d'ina reducziun. Là fiss il nov pe da taglia 95% enstagl 99%.

Domat e Landquart - 2 vischnancas grondas en in'emprima reacziun

La presidenta communala da Domat, Beatrice Baseliga, di che Domat perdia circa 300'000.- francs. Quai nun saja ina catastrofa di la socialdemocrata, dentant fiss i meglier dad investir en resursas umanas che da reducir il pe da taglia per persunas giuridicas.

Main critic è Sepp Föhn, il president communal da Landquart. Tenor il cristiandemocrat perdess la vischnanca bain circa 100'000 francs svizzers entras la mesira da la regenza. I saja dentant impurtant da porscher in ambient attractiv a las interpresas e las autras persunas giuridicas.

Emprimas reacziuns criticas da la politica

Tant ils Socialdemocrats sco era ils Cristian-democrats han reagì a moda critica sin l'annunzia da la regenza. Quai saja ina politica da privilegis per paucs scriva la PS. E per la PCD è ina reducziun da las taglias per persunas giuridicamain in proceder fitg dubius - en vista als defizits previs ed a mesiras da spargn ch'èn da spetgar.