Siglir tar il cuntegn
Inhalt

Chantun 240'000 francs per rinforzar il viaduct da la Landwasser

Cun in concept communabel vulan la Viafier retica, la regiun Alvra e Grischun vacanzas crear ina nov'attracziun turistica. En il center da quella duai star il viaduct da la Landwasser sco «simbol dal Grischun».

Ozendi attiria il viaduct da la Landwasser, ch'è part dal patrimoni mundial da l'UNESCO, per gronda part mo interessents da la viafier. Quai duaja ussa sa midar, dian ils iniziants dal project.

Inscenar e commerzialisar il viaduct

Il project duai inscenar e commerzialisar il viaduct, ch'è avert gia dapi il 1903, sco in monument caracteristic dal Grischun.

Sco ils mainaprojects communitgeschan, duai uschia vegnir stgaffida in'attracziun, che generescha dapli giasts per l'entir chantun.

Tenor Martin Vincenz, il CEO da Grischun vacanzas n'èsi dentant betg l'idea da remplazzar ils capricorns Gian e Giachen mabain da cumplettar quels. L'idea saja da stgaffir cun il viaduct ina icona per il Grischun sco la tur d'Eiffel per Paris ni il Matterhorn per il Vallais. Ils capricorns stettian per la marca Grischun ed il viaduct saja ina icona.

Lieu neutral e central

Ins avess era pudì prender tut insatge auter ch'il viaduct sco icona, uschia Martin Vincenz. I dettia numnadamain pliras pussaivladads, saja quai lura architects, festivals da cultura, flums e lais ubain las linguas. Tuttina dettia plirs arguments per il viaduct:

  • il viaduct è entamez il Grischun,
  • cuntanschibel da tut las destinaziuns,
  • tuts san duvrar el per far reclama (betg lià u lunsch davent d'ina destinaziun)
  • cun il patrimoni mundial da l'UNESCO e la Viafier retica datti gia in fundament per bajegiar si las activitads

Ch'i vegnia uschia fatg reclama be per la Viafier retica na lascha Martin Vincenz betg valair. Grischun vacanzas vegnia er vinavant a far reclama cun las destinaziuns e purschidas enconuschentas sco mountainbike, skis u viandar, uschia il directur da Grischun vacanzas.

Raps dal chantun

Il project vegn, sco part dal program da turissem 2014 – 2021, sustegnì dal chantun cun 120'000 francs. Las vischnancas da la regiun Alvra e la Viafier retica contribueschan mintgamai 60'000 francs. Igl è planisà d'avair in concept concret entaifer in onn – e fin il 2019 duai il viaduct da la Landwasser pudair sa preschentar sco attracziun turistica.

RR novitads 10:00