Siglir tar il cuntegn

Header

Baselgia da dadens.
Legenda: La gievgia è vegnì preschentà il program per la notg lunga da las baselgias. MAD, Caroline Staeger
cuntegn

28 da matg 2021 La notg lunga da las baselgias

Concerts, teaters, films e cults divins - tut quai porschan diversas baselgias refurmadas durant ina saira: La notg lunga da las baselgias ha lieu l'emprima giada ils 28 da matg 2021 en las baselgias grischunas.

Per la premiera da la notg lunga da las baselgias en il Grischun vegnan organisads concerts, films, teaters, guidas e cults divins. L'eveniment che ha lieu en l'entir Europa datti en Svizra dapi quatter onns.

Ins po sa participar ad occurrenzas, ch'i na dat betg mintga di.
Autur: Marianne Strubravarenda Ardez, Ftan, Guarda

Las portas s'avran cun il tutgar dals zains a las 18:00 e serran a mesanotg. Durant quest temp pon ins a Cuira per exempel guardar projecziuns da stailas en la baselgia son Martin u tadlar referats en la baselgia da la sontga Regula. A Poschiavo pon interessadas ed interessads explorar l'orgla dadens ed ad Ardez datti tranter auter in concert da rock.

audio
Notg lunga da las baselgias en Grischun
02:29 min, Actualitad dals 20.05.2021.
laschar ir. Durada: 02:29 minutas.

La cumbinaziun da la baselgia ed ils dirs tuns da rock na saja betg ina cumbinaziun enconuschenta, possia dentant cuntanscher in public pli giuven, di Marianne Strub, ravarenda d'Ardez, Ftan e Guarda. Ed ins possia vinavant mussar la baselgia d'ina autra vart ed avrir uschia las portas per mintgina e mintgin.

Musica da rock – organisada da la baselgia

L'engaschament da la baselgia saja per la band da rock Reat stà ina surpraisa. Ils trais musicists engiadinais s'allegran dentant sin il concert sin la plazza Crusch ad Ardez, di Jon Andri Gaudenz, che suna la ghitarra e chanta.

Nus sperain ch'i dat ina festa, suenter in uschè lung temp senza concerts vegn segir glieud.
Autur: Jon Andri Gaudenzchantadur e ghitarrist pro Reat
trais giuvens sunan, dus cun ghitara ed in sin la batteria
Legenda: Ad Ardez vegni a dar in concert da rock da la band Reat. MAD, Caroline Staeger

Sur 130 occurrenzas porschan las baselgias refurmadas en il Grischun, tuttas organisadas tenor las mesiras d'igiena actualas. L'eveniment è gratuit e duess esser tenor las organisaturas ed ils organisaturs in segn da plaschair suenter in temp da sfidas.

RTR actualitad 11:00

Artitgels legids il pli savens

Scrollar a sanestra Scrollar a dretga