Per la premiera da la notg lunga da las baselgias en il Grischun vegnan organisads concerts, films, teaters, guidas e cults divins. L'eveniment che ha lieu en l'entir Europa datti en Svizra dapi quatter onns.
Ins po sa participar ad occurrenzas, ch'i na dat betg mintga di.
Las portas s'avran cun il tutgar dals zains a las 18:00 e serran a mesanotg. Durant quest temp pon ins a Cuira per exempel guardar projecziuns da stailas en la baselgia son Martin u tadlar referats en la baselgia da la sontga Regula. A Poschiavo pon interessadas ed interessads explorar l'orgla dadens ed ad Ardez datti tranter auter in concert da rock.
La cumbinaziun da la baselgia ed ils dirs tuns da rock na saja betg ina cumbinaziun enconuschenta, possia dentant cuntanscher in public pli giuven, di Marianne Strub, ravarenda d'Ardez, Ftan e Guarda. Ed ins possia vinavant mussar la baselgia d'ina autra vart ed avrir uschia las portas per mintgina e mintgin.
Musica da rock – organisada da la baselgia
L'engaschament da la baselgia saja per la band da rock Reat stà ina surpraisa. Ils trais musicists engiadinais s'allegran dentant sin il concert sin la plazza Crusch ad Ardez, di Jon Andri Gaudenz, che suna la ghitarra e chanta.
Nus sperain ch'i dat ina festa, suenter in uschè lung temp senza concerts vegn segir glieud.
Sur 130 occurrenzas porschan las baselgias refurmadas en il Grischun, tuttas organisadas tenor las mesiras d'igiena actualas. L'eveniment è gratuit e duess esser tenor las organisaturas ed ils organisaturs in segn da plaschair suenter in temp da sfidas.