Ils 3 da schaner 2018 tranter las 14:00 e 17:00 po mintgin e mintgina purtar ses regal en la cafetaria da la chasa RTR e star da cumpagnia. Per divertiment musical procuran ils chantauturs sursilvans Alexi e Marcus.
Paupradad en Svizra è savens invisibla
600'000 persunas valevan tenor statistica il 2016 en Svizra sco paupras. Savens na crodan quellas persunas dentant betg si en il mintgadi. Franz Schultheis ch'è sociolog a l'Universitad da Son Gagl enconuscha las differentas fatschas da la paupradad en Svizra. El di schizunt ch'ins possia ertar paupradad.
Durant 23 onns ha la dunna oriunda da l'Appenzell, che vul star anonima vivì en paupradad. Ella e ses dus uffants n'hajan mai pudì far vacanzas sper la mar u da skis. Ma ella haja adina empruvà da porscher insatge ad els. Uschia sajan els stads bler en la natira ed hajan cunzunt giudì la natira ch'è gratuita.
Er Gabriela Feldhaus viva dapi blers onns sut il cunfin da paupradad. Quai haja laschà enavos fastitgs. Dapi 26 onns è ella en terapia. La terapia sco er la lavur tar in project social dettia forza a la dunna Songagliaisa. En la societad sa sentia ella savens serrada ora – cunquai ch'ella na possia betg prender part a discussiuns davart vacanzas, producziuns da teater u er il pli nov film da kino.
RR actualitad 08:00