Chantun - 3 milliuns per 76 projects da muntogna grischuns
L’Agid svizzer per la muntogna ha sustegnì l’onn passà 76 projects da turissem, agricultura u er d’energia e furmaziun en il Grischun. Quai cun radund 3 milliuns francs, communitgescha la fundaziun.
Suenter il chantun Berna cun 6,5 milliuns è il Grischun cunquai il chantun ch’ha survegnì ils pli blers daners. Tut en tut ha l’agid svizzer sustegnì 567 projects cun 32,6 milliuns francs. Questa summa ordvart auta saja d’attribuir al giubileum da 75 onns da la fundaziun.
«A maisa en la muntogna»
Ils numerus projects che vegnian sustegnids mussian quant impurtant che «l’agid a l’agid a sasez» da l’Agid da muntogna svizzer saja per far frunt a la depopulaziun.
Tgi è la fundaziun?
Avrir la boxSerrar la box
L’Agid da muntogna svizzer è in’organisaziun che vegn sulettamain finanziada da donaziuns. La finamira è da megliurar la basa d’existenza e las cundiziuns da viver per las regiuns da muntogna en Svizra.
La campagna da collecta da quest onn sa deditgescha al tema «A maisa en la muntogna» ed appellescha per sustegn da gastronoms e producents en regiuns da muntogna dals 4 fin ils 16 da favrer.
