Siglir tar il cuntegn

Header

Navigaziun

cuntegn

Chantun 30 onns filarmonia da chombra dal Grischun

Sur l'entir onn or vegnan ils musicists da la filarmonia da chombra a concertar en il Grischun. Per lur giubileum da 30 onns han els tschentà ensemen in program spezial e vulan uschè era s'avrir ad in auditori pli vast.

Legenda: Guardar il video 30 onns filarmonia da chombra dal Grischun. Durada 03:06 minutas.
Or da Telesguard dals 11.01.2019.

L'onn 1989 – pia avant exact 30 onns – han il dirigent Christoph Cajöri ensemen cun inqual musicist fundà l'orchester da chombra grischun. Or da quel è sa sviluppà vinavant la filarmonia da chombra. Per il giubileum vegnan ils sur 30 musicists cun lur dirigent Philippe Bach a sa preschentar inqual giadas. Sur l'entir onn ora dat i blers concerts a Cuira, dentant era en autras regiuns dal Grischun sco a Poschiavo, Savognin ni Flem.

Instruments actuals da l'orchester filarmonic

Personen-Box aufklappenPersonen-Box zuklappen
  • Instruments dad artg (9 violinas, 4 violas, 3 cellos, 1 cuntrabass, 1 arpa)
  • Instruments da flad da lain (2 flautas, 2 oboas, 2 clarinettas, 2 fagots)
  • Instruments da flad da tola (2 corns, 2 trumbettas, 1 posauna)
  • Instrument da percussiun (1 pauca)

Musica da film ed opera

La filarmonia da chombra sa preschenta par exempel cun musica da l'emprim film lung da Charlie Chaplin «The Kid». Dal schaner fin tochen mez favrer sunan els live la musica, durant che maletgs da Chaplin van sur la paraid. Quai, sut la batgetta da l'expert per musica da film Ludwig Wicki.

Fin matg pon ins udir ils musicists cun in auter gener musical, numnadamain cun l'opera «Die Weise von Liebe und Tod des Cornets Christoph Rilke» dal cumponist svizzer Frank Martin. Quella producziun è ina collavuraziun cun il teater da Cuera.

La producziun d'opera cun la solista Maria Riccarda Wesseling, il star mundial dal Grischun, è in grond highlight da l'onn da giubileum.
Autur: Philippe Bachdapi 2016 dirigent da la filarmonia da chombra dal Grischun

Turnea da stad e concert gratuit en halla da citad

In ulteriur punct fix dil program da l'onn è la turnea da stad cun ils instruments d'artg (fin zercladur tochen mez avust) sut il titel «Muothataler Nachtmusik». Quai concert sa metta ensemen ord quatter tocs: Tranter auter ina serenada da Peter Tschaikowsy en C-Dur ed in toc da Heinz Marti per orgelin da maun da Sviz («Schwyzerörgeli»).

Per festivar ils 30 onns dat la filarmonia fin avust er in grond concert gratuit per in e scadin en la halla da citad a Cuira. Là suna l'orchester in concert per violoncello ed instruments a flad dal cumponist austriac Friedrich Gulda.

La filarmonia da chombra vul s'avrir

En connex cun il giubileum da la filarmonia da chombra dal Grischun pon ins sa dumandar, tgi che taidla anc quella musica. Bleras giadas audan ins che questa musica d' in «orchester classic» vegnia betg tadlada da glieud pli giuvna. La maioritad da l'auditori èn persunas pli veglias, conferma era la presidenta Jacqueline Giger Cahannes.

Cun il vast program emprova l'orchester dentant era da s'avrir ad in auditori pli vast e da carmalar uschè persunas pli giuvnas. Cun giuven manegia la presidenta la generaziun tranter 40 e 50. Plinavant ha la filarmonia da chombra dapi questa stad installà la pli pitschna halla da concert: Ina cabina da telefon nua ch'ins po betg telefonar, mabain tadlar lur musica.

Or da l'archiv:

Legenda: Guardar il video Filharmonia da chombra Grischun en l'archiv. Durada 02:15 minutas.
Or da RTR dals 11.01.2019.

RTR Telesguard 17:40