Siglir tar il cuntegn
Inhalt

Chantun 36 accidents sin las vias grischunas

Las navaglias da la fin d'emna passada han er causà blera lavur per la Polizia chantunala. Ella è vegnida clamada 36 giadas tar accidents sin las vias grischunas, scriva ella en ina communicaziun a las medias.

Las cundiziuns invernalas hajan surdumandà divers ch’eran en viadi la fin d’emna, scriva la Polizia chantunala en sia communicaziun. En tut saja ella vegnida clamada a 36 accidents en tut il chantun – uschia per exempel ad in accident sin la via ennavada en la val d’Avras.

Accident en val d'Avras

Là era in automobilist (22) glischnà sin l’auter vial da la via e collidà cun in auto ch’era vegnì encunter. Trais persunas sajan vegnidas feridas levamain e perquai vegnidas purtadas cun l’ambulanza en l’ospital da Tusaun. L’automobilist saja stà alcoholisà, il test correspundent positiv, scriva la polizia.

Para nagins accidents pli grevs

Malgrà tants accidents, na pari betg dad avair dà accidents pli grevs. La polizia scriva nagut da ferids grevamain u perfin mortalmain.

Intgins dals automobilists sajan anc stads en viadi cun pneus da stad. Ils servetschs da rumir vias hajan gì da far ils mauns plains dad ir cun la naiv e la massa da bostgs crudads. Otg vias da pass hajan stuì vegnir serradas temporarmain.

Situaziun sin via

  • La situaziun tar ils pass: Il Flüela, l'Alvra (da Bravuogn fin a La Punt Chamues-ch), il San Bernardino, il Spleia ed il Lucmagn restan serrads. Ils pass Bernina, Malögia e Güglia èn cuverts cun naiv.
  • Naiv hai er sin las vias en l'Engiadin'Ota, sur il pass dal Fuorn, da Tusaun fin a Mulegns ed en Surselva en Val Tujetsch e Val Medel.
  • Tranter Tschamut-Selva ed Andermatt-Ursera na datti il mument nagin traffic public, perquai ch'i naiva ferm. Fin cura ch'il disturbi dura n'è betg enconuschent.
  • Uschiglio circuleschan ils trens da la Viafier retica VR puspè tenor urari.

Vias e traffic

Vias e traffic

Qua tar la situaziun actuala da las vias e dal traffic.

La polizia da Cuira è stada en acziun l'entira notg

Er la polizia da la citad da Cuira ha gì bler da far pervi da la naiv. Igl haja adina puspè dà impediments per il traffic pervi da roms ruts giu e plantas cupitgadas, scriva la polizia en ina communicaziun.

Per motivs da segirezza haja ella stuì serrar pliras vias per in tschert temp, uschia la polizia. Plirs vehichels ed edifizis sajan vegnids donnegiads. Persunas blessadas n'haja però betg dà.

Nua hai dà quanta naiv?

  • Arosa 72 cm
  • Val 68 cm
  • Mustér 55 cm
  • Tavau 42 cm
  • Bivio 41 cm
  • Cuira 10 cm

RR novitads 06:00+