Mesemna ha la Partida socialdemocratica surdà a la chanzlia chantunala 4'384 suttascripziuns ch'ella ha rimnà per l'iniziativa «90 deputads èn avunda». Ils davos onns sajan las instituziuns en il Grischun vegnidas modernisadas. Quai haja manà tar dapli transparenza e dapli proximitad tar il burgais. I dettia dentant ina gronda excepziun: Il Cussegl grond. Quel stoppia vegnir refurmà, uschia ils iniziants, e quai giaja cun reducir el da 120 sin 90 deputads:
I vegniss lavurà pli effizient e nus avessan be pli glieud en il parlament che lavura er en las cumissiuns, uschia che las resursas pudessan vegnir duvradas meglier e pli effizient.
Tenor ils iniziants daventass il Grischun er pli democratic. En 15 da 39 circuls d'elecziun haja quai dà precis tuttina blers candidats sco sezs tar las davosas elecziuns. Quai na saja betg democratic. Las regiuns fissan vinavant represchentadas tuttina bain, manegian ils iniziants.
Segunda emprova
Gia l'onn passa aveva la PS empruvà da sminuir il Cussegl Grond da 120 sin 90 cun ina moziun. Quella avevan las deputadas ed ils deputads dentant refusà. Sinaquai aveva la PS annunzià da vulair lantschar l'iniziativa dal pievel. Cun las 4'384 suttascripziuns è il dumber necessari vegnì cuntanschì. Uschia ch'il Cussegl grond sto lura puspè sa fatschentar cun la dumonda.
RR novitads 12:00