Siglir tar il cuntegn

Header

video
Quint annual dal chantun serra puspè cun in plus
Or da Telesguard dals 26.03.2015.
laschar ir. Durada: 2 minutas 9 Secundas.
cuntegn

Chantun 55 milliuns gudogn empè da 58 milliuns deficit

Il Grischun po preschentar in quint annual 2014 positiv. Empè d'in deficit da 58 milliuns francs resulta in surpli da retgav da 55 milliuns. Il resultat è pia per 100 milliuns meglier che budgetà.

Tranter auter èn las entradas da taglia bler pli autas che spetgà. Ellas èn 57 milliuns sur il preventiv. Perquai ch'i ha dà amortisaziuns pli bassas, è er il quint economic pli positiv. Igl ha dà damain expensas e dapli entradas en il quint d'investiziun.

Survista da resultats impurtants

  • 55 milliuns francs gudogn
  • Budgetà eran 58 milliuns francs deficit
  • Custs da persunal: Creschids per 1,9%
  • Entradas da taglia: + 56,8 milliuns francs

Auts custs da persunal

Il quint annual en 3 parts lubescha in’examinaziun pli differenziada. «Malgrà il resultat positiv na dastgan ins betg survesair ch’ils custs da manaschi sajan danovamain creschids» di la directura da finanzas Barbara Janom Steiner. Ils custs da manaschi dal 2014 muntan a passa 2,5 milliardas francs. Cunzunt èn ils custs da persunal creschids, quai per 6,5 milliuns francs sin total 355,9 milliuns francs (+1,9%).

Bilantscha dal quint 2014 dal chantun Grischun.
Legenda: Bilantscha dal quint 2014 dal chantun Grischun. RTR

Entradas da taglia èn creschidas

Las entradas da taglia dal chantun Grischun èn creschidas per 56,8 milliuns francs sin 761,3 milliuns francs (+8,1%). La gronda part da questas entradas sa resulta da la taglia sin entrada e sin la facultad da persunas privatas (+50,3 milliuns).

Consequenzas dal ferm franc èn intschertas

Per l’onn current 2015 quinta il chantun cun in resultat positiv. La Banca naziunala svizra dat al chantun ina contribuziun da radund 32 milliuns francs. Las consequenzas da l’aboliziun dal curs minimal da l’euro sajan grevas da giuditgar. Da temair sajan diminuziuns dal retgav tar la gulivaziun da finanzas e tar las taglias da persunas giuridicas en consequenza da la refurma da la taglia sin interpresas III.

RR novitads 10:00

Artitgels legids il pli savens