Siglir tar il cuntegn

Header

audio
Bunura: Son Niclà e ses asen Pablo
Or da Actualitad dals 06.12.2019.
laschar ir. Durada: 03:52 minutas.
cuntegn

6 da december Pablo – l’asen dal Son Niclà da Cuira

El ha verruct gugent carottas e maglia mintgatant in spagnoletti cun paletscha e tut – Pablo, l’asen dal Son Niclà da Cuira. Uschiglio sa nutrescha el da fain.

Sch’el turna d’ina tura strapatschusa tras la citad survegn el mintgamai in müesli dad avaina. Tut quai raquinta il Son Niclà da Cuira da ses cumpogn cun pel nair ed ureglia lunga. Ensemen cun il famegl sajan els in bun team.

Pitschen e grond hajan plaschairun sch’els cumparian en la citad. Ozendi vesian ins gea mo darar pli asens. Perquai saja mintgatant il Pablo il star. Sco lezza giada ch’els avevan fatg ina visita en in café a Cuira.

Pablo e ses dabasegns

L’emprim aveva l’asen fatg il botsch e betg vulì entrar en il local illuminà e fullanà. Ma tuttenina saja l’asen marschà ina lingia en il local a la teca, nua ch’el haja survegnì ina carotta. La glieud haja gì in plaschairun dal pitschen asen.

Tuttenina han il Son Niclà e ses famegl dentant stuì festinar. L’asen ha gì da far ses basegns. Els èn gist anc vegnids a temp en il liber, uschia che Pablo ha pudì laschar dar ses dagross sper ina planta.

Pablo avess navidas sch’ins schess ch’el saja tup. Asens èn animals fitg intelligents.
Autur: Sontgaclauda Cuira

RR actualitad 07:00