En duas filialas da la Migros e duas dal Denner en il Grischun po la clientella davent da glindesdi dar si u prender encunter in pachet. Sco quai che la Migros communitgescha, vegn il nov servetsch introducì en l'entira Svizra en radund 300 filialas. Fin la fin dal 2020 duai quai esser pussaivel en passa 4'200 filialas.
En il Grischun vegn il nov servetsch il mument offrì en ina filiala da la Migros a Landquart ed a Tavau sco era en ina filiala dal Denner a Cuira ed a Tavau.
Datiers d’ina posta na datti betg la purschida
Sco la pledadra da medias da la Migros, Cristina Maurer Frank, ha ditg saja la distanza fin tar il proxim spurtegl in dals criteris, en tgenins dals «PickMup» era porscher il servetsch per pachets da La Posta. Ins na veglia betg concurrenzar las filialas da La Posta, mabain porscher ina plivalur al client, ha ditg Cristina Maurer Frank. Uschia na vegnia quai probabel betg a dar la purschida tar il «PickMup» Glion, cunquai che La Posta sa chattia en il medem bajetg.
Observar svilup
Tenor la Migros veglian ins uss observar, co la purschida vegn recepida e lura decider sche quella duai vegnir engrondida – per exempel sin las filialas dal Denner en il Grischun. Ed era La Posta ha confermà, ch’els sajan cuntents da questa collavuraziun.
Necessari è in conto online tar La Posta
Il nov servetsch da La Posta vegn integrà en la purschida da «PickMup» da la Migros. Per retrair pacs u brevs inscrittas en ina filiala da la Migros dovr'ins in conto online tar La Posta. Uschia saja pussaivel da laschar sviar il pac en la filiala giavischada.
RR actualitad 12:00