Siglir tar il cuntegn

Header

Navigaziun

cuntegn

Chantun A mintga chamin ses spazzachamin

24 manaschis da spazzachamin datti en il Grischun. Finadin da quels manaschis ha ina concessiun per insumma dastgar lavurar. Quella concessiun lubescha ad els da porscher en ina regiun che vegn fixada lur lavurs.

Mintgin dals 24 manaschis da spazzachamin en il Grischun ha ina concessiun. Quella concessiun fixescha precis en tge regiun, ch'il manaschi dastga porscher sias lavurs. Ella fixescha dentant er tge lavurs ch'il spazzachamin ha da far e sut tge cundiziuns. Per exempel èn las tariffas dals spazzachamins en il Grischun dapertut tuttina.

Igl è in sistem da monopol che garantescha ch'i dat la purschida da spazzachamin en l'entir Grischun sut las medemas cundiziuns, perquai è er tut reglà uschè precis, quai declera Marco Sgier da l'assicuranza da bajetgs. Quella è responsabla per la part da la protecziun cunter incendis tar ils spazzachamins.

Ils spazzachamins n'èn dentant betg mo responsabels che las pignas n'hajan nagins donns – els èn er responsabels per controllar ch'ins brischia mo quai ch'ins dastga brischar. Els han pia l'incumbensa da controllar tge laina che sa tschenta en pigna ed er co quella vegn magasinada.

Monopol gida regiuns perifericas

Tenor Marco Sgier èn ils monopols en il Grischun impurtants per las regiuns perifericas. Uschia èsi er en quellas regiuns attractiv da porscher servetschs da spazzachamin. Sch'i na dess betg il monopol fissi pli grev da porscher buns pretschs en regiuns, nua ch'ils bajetgs èn spatitschads. Ins po pia er discurrer d'in sistem solidaric. Sacrosanct n'è quel dentant betg, differents chantuns han schlià il monopol ed er en il Grischun hai gia dà da quellas discussiuns. Cussegl grond ed er regenza avevan dentant il 2011 decidì da mantegnair ils monopols.

RR actualitad 07:00