«A partir da glindesdi, ils 16 da mars 2020, a las 12.00, per entant fin ils 30 d'avrigl 2020, a las 24.00, valan las suandantas mesiras supplementaras: […]», uschia cumenza il decret istoric che la regenza ha decidì dumengia saira e publitgà glindesdi en damaun. En vista al dumber da cas da la malsogna Covid-19 che crescha e l'effect che quai ha sin il sectur da sanadad e l'economia.
Las pretensiuns principalas
- la populaziun duai reducir sia mobilitad – pia restar a chasa
- serrads vegnan negozis, butias, restorants, purschidas da bellezza
- scumandadas èn era tut las reuniuns religiusas (sepulturas mo pli en il pli stretg ravugl da la famiglia).
Excepziuns per viver e surviver il mintgadi
Averts restan negozis e partiziuns da negozis cun victualias, apotecas, drogarias, spurtegls da bancas e posta, kioscs e butias da tancadi.
Lubidas restan furniziuns da pasts da restorants, da curiers da pizza e sumegliants servetschs – sco era stans da vendita betg stabels senza la pussaivladad da mangiar al lieu.
Era lubidas restan terapias medicinalas, entant che tractaments da cosmetica e da wellness n'èn betg pli pussaivels.
Schliaziun speziala per hotels
Hotels dastgan restar averts e dastgan vinavant porscher pernottaziuns e pasts als giasts che pernotteschan. Era qua però mo cun respectar strictamain la regla da 50 persunas, e las recumondaziuns da l'Uffizi federal da sanadad publica pertutgant l'igiena e la distanza sociala.
Cantinas da manaschis dastgan era restar avertas, quai dentant senza giasts externs. I vala però la regla che maximalmain 50 persunas dastgan esser il medem mument en la medema localitad (cumprais il persunal) e las reglas recumandadas dals uffizis da sanadad.
Consequenzas economicas
La taskforce che la regenza ha instradà vegn ad analisar las consequenzas da questas novas mesiras per ils manaschis – surtut areguard la dumonda da la liquiditad.
Link
Dapli fatgs, infurmaziuns ed istorgias chattais qua.
RTR novitads 22:00
